Ka FC Goa kaba dei kawei na ki kynhun ba khlaiñ bad paw bha ha ka lympung Indian Super League (ISL) ka la ioh ban khur sa 3 poiñ ha ka jingiakhun pyrshah ia ka klob shipai na Nepal, ka Tribhuvan FC ha madan Jawaharlal Nehru stadium Polo, Shillong.
Napdeng ki kynhun ba don ha ka group D, ka Goa kadei ka kynhun kaba la ïoh ban rung nyngkong, bad ka Tribhuvan kadei kaba la tikna ban leit īing noh, kata hadien ka jingiakhun ba khatduh bad ka Rangdajied ha ka 13 tarik mynta u bnai, katba ka Rangdajied bad Shillong Lajong kiba dang don sa mar 2 tylli ki jingialehkai kin hap ban iakhun tyngeh na ka bynta ban ioh rung sha kawei ka wat.
Haha phai ha ka jingiakhun kaba hynnin ka sngi (8 Nailar), ka Goa ka la sdang ia ka jingïakhun da ka jingïoh ban thep ia ka kol kaba sted tam mynta ka samoi, kata lyngba ka kol jong u Abawiha tang hapoh shi minit. Ka jingiakhun ka long kaba kham jwat bad la sakhi ba ka klob Nepal ka la seibor shisha da ka jingangnud ban ioh ia ka jingjop kaba nyngkong hynrei namar ka jingtbit ki rangialehkai ‘dien ka Goa la khanglad noh ia ki haduh ba kut ka minit ïalehkai.
Tang hadien ba kut ka kylla step, ka Goa ka la ioh ban thep sa shi kol lyngba u Sitroy ha ka minit ba 55 hynrei ka Tribhuvan ka la ioh ban pynphai noh shi kol lyngba ka jingtbit ki rangialehkai ba shakhmat, kata ha ka minit ba 66.
Ka Goa kan bteng biang ia ka jingïakhun ha ka 17 tarik Nailar pyrshah ia ka Shillong Lajong ha ka por 7 baje janmiet ha kajuh ka madan.