Watla ka Rangdajied United FC ka la ïoh ia ka kabu ban ialehkai ha kane ka lympung Durand Cup na ka jingbym lah shuh ka Hyderabad FC ban wan ïalehkai ha kane ka lympung, kane ka klob kaba na kane ka jylla ka la pdiang ia kane ka jingtyrwa hadien 4 tylli ki klob ki la kyntaid bad lah ruh ban ong ba ka dei da ka jingbymbanse hynrei ka long pat ka jingkyrkhu ia kane ka klob namar ka dei ka sien ba nyngkong ia ki ban ïoh ïalehkai ha kane ka lympung kaba heh bad ka sien ba nyngkong ruh ban iakhun pyrshah ia ki klob Indian Super League (ISL).
Ka Rangdajied ka khlem ioh ban pynkhreh na ka bynta kane ka lympung hynrei lah ban ïohi ba ka jingialehkai ka long kaba itynnad watla ka FC Goa ka la lah ban pynliem da 4-3 kol.
Ki paidbah nongkyrshan jong ka Rangdajied ki la lyngngoh ia ka jingtbit jong kane ka klob bad lah ban ong ruh ba ym don ba khmih lynti ba ka klob shnong (local club) kan iadei bor bad ka klob kaba la paw bha ha India.
Katkum ka jingbishar jong u paidbah, ka Rangdajied ka kham khlaiñ bad kham ioh shibun ki kabu ban thep kol. Don katto katne kiba ong ba ka Goa ka jop na u rephri, don ruh kiba ong ba ki la jop da ka jingioh haduh 2 tylli ki penalty.
Ha kane ka jingialehkai ka Goa ka la ioh ban thep ia ki 4 kol lyngba u Leander, Davindra, Abhaviha, Vellington, katba na ka bynta ka Rangdajied ia ki kol la ïoh ban thep da u Owanijuh, Pynbha bad Apbor.
Ka Rangdajied kan bteng biang ia ka jingiakhun ha kane ka lympung pyrshah ia ka Shillong Lajong ha ka 10 tarik mynta u bnai por 4 baje janmiet ha madan Jawaharlal Nehru stadium Polo, Shillong.
