Ka klob Shillong Lajong ka la pynshaïong ia ki rangialehkai ka klob East Bengal, Kolkata hynne ka sngi ha ka jingïakhun ba la pynlong ha madan Jawaharlal Nehru stadium, Polo Shillong. Ka Bengal kadei kawei na ki klob ba khlaiñ bad paw bha ha ka India kaba dei ruh ka klob kaba la ioh ban ïalehkai ha ka lympung kaba heh tam ha India, ka Indian Super League (ISL) hynrei ha ka jingïakhun pyrshah ia ka Lajong kane ka kynhun ka la liem noh da 2-1 kol.
Kane ka jingjop ka la pynkyndit ruh ia ki nongpyniaid ka Durand Cup namar ka Lajong kadei tang ka klob shnong kaba rit bad kaba dang ïoh ïalehkai tang ha ka lympung I-league hynrei ka la pynkhyllem ia kane ka radbah khlem poi pyrkhat.
Ym lah ban len ba kane ka jingialehkai kadei ka jingialehkai ba itynnad tam na baroh ki jingialehkai ba ka Lajong ka la pyndep mynta ka samoi. Ym lah ruh ban buhrieh ia ka jingshisha ba ka Lajong ka lah ban ïalehkai bha na ka jingïoh ïalehkai ha la ïing (home) bad na ka jingieid ki nongkyrshan kiba la wan ban kyrshan radbah naduh ba sdang khamtam ha kane ka jingialehkai quarter final.
Naduh ba sdang ka jingïakhun, la ïohsngew ia ka jingpyrta jong ki paidbah ia ka kyrteng ‘Lajong Lajong’ kaba la ai mynsiem ruh ia ki rangialehkai ba kin ïalehkai bha ban ban pynkmen ia ki nongkyrshan. Ka Lajong ka la lah ban ïalehkai bha naduh ba sdang ka minit ïalehkai bad la ioh ruh shibun ki kabu ban pynkhih jar bad tang hapoh 8 minit ka Lajong ka la ioh shi kol lyngba u Rudwere. Hadien ka kylla step ka Bengal ka la ioh ban pynphai ia katei ka shi kol hynrei lyngba ka jingiai iakhun ba tyngeh bad ka jingiai bteng ki paidbah ban ai mynsiem ka Lajong ka la ioh ban thep sa shi kol lyngba u Figo Syndai ha ka minit ba 84.
Lyngba katei ka jingjop ka Lajong ka la ïoh ban jam sha ka semi final jong kane ka lympung hynrei kaba diaw khyndiat ka long kane ka kynhun kan hap ban iakhun semi final pyrshah ia ka klob Northeast United FC kaba dei ruh ka klob kaba mih khmat na kane ka thaiñ Lam Mihngi (North East) baroh kawei.
Na jingbun ki nongkyrshan ka jingïakhun ia ka semi final ka don jingkyrmen ban pynialehkai ha kane ka nongbah, namar ka Kolkata ka dang don hapdeng ka jingklumar haduh mynta hynrei ia ka rai ba khatduh yn ap na ki nongpyniaid ka Durand Cup.
