Ka Shillong Lajong FC kaba dei ruh ka klob kaba nyngkong ban ioh mih khmat ia ka jylla ha ka lympung Durand Cup ka la iasam mar shi poiñ hynne ka janmiet ha ka jingiakhun pyrshah ia ka klob kaba khlaiñ kaba don ruh ha ka lympung Indian Super League, ka FC Goa ha Jawaharlal Nehru stadium Polo Shillong.
Ha katei ka jingïakhun ka lajong ka la ïoh ban thep ia ka shi kol ha ka kylla step lyngba u Silva ha ka minit ba 30 hynrei tang hadien 3 minit ka Goa ka la ioh ban pynphai lyngba u Devendra. Ka jingiakhun ka long kaba jwat bad kaba itynnad bad la sakhi ba ka Lajong ka la lah ban ïalehkai bha na ka jingbun ki nongkyrshan. Ka jingiakhun ka la kut noh da 1-1, baroh 2 tylli kine ki kynhun ki la ioh ban rung (qualified) sha thup ba 32.
Ka long ka jingkmen bad ka jingsngewsarong na ka bynta ka jylla ban ioh pdiang (host) ia kane ka lympung kaba la ioh ia ka jingithuh ha ka pyrthei. La sakhi ba ka jingpynkhreh ka long kaba janai bad la nang pynbha ruh ia ki jaka peit, ki jaka ieng kali bad ki lynti iaid shwa ban poi sha stadium.
Ka jingiasnoh kti lang jong ka sorkar jylla naduh ba la ioh ia ka jingtip ba ka jylla Meghalaya kan sa pdiang ia kane ka lympung ba heh, ka la long ka jingkyrkhu kaba khraw na ka bynta ki nongialehkai bad baroh ki nongkyrshan ba radbah ka Shillong Lajong FC.
Ka Lajong ka la ba ioh ban rung ha ka sien ba nyngkong sha kawei pat ka wat jong kane ka lympung, kata ka thup ki 32 lyngba ka jingïoh ban ïalehkai ha la ïing (home match).
