U Myntri ba dei peit ia ka tnad ka koit ka khia (Health & Family Welfare) u ma Wailadmiki Shylla haba jubab ia ka jingkylli ba la buh mynta ka sngi ha ïing Dorbar da u bah Heaving Stone Kharpran, MLA na Mawryngkneng, ula iathuh ba ha baroh ka Jylla ki don 54 tylli ki Dialysis Machine. Na kine 12 tylli ki don ha ki Civil Hospital Shillong bad 42 tylli pat ki dei kiba don ha ki Hospital jong ki Riew shimet (Private Hospital).
U ma Wailadmiki u la iathuh ruh ba ki don ki nongtrei kiba la tbit ha ka liang ka jingpyndonkam ia kine ki machine Dialysis, kumta kam long kaba eh ia ki paidbah ban ioh jingsumar na ka liang ka Dialysis.
Haba jubab ia ka jingbynrap na ka MLA jong ka Ampati ka Miani D. Shira kaba la kylli la kine ki machine ki don ne em sha kiwei pat ki District hapoh ka Jylla. U Myntri ula jubab ba kumba long mynta ym pat lah ban buh ia ki Dialysis machine ha man la ki District. Lait na East Khasi Hills kiwei pat ki jaka sumar ba don ia kine ki machine ki kynthup ha Tura 5 tylli, ha Jowai 4 tylli bad na kine 3 tylli ki khlem treikam, ha Nongpoh 2 tylli, ha Mairang 3 tylli bad ha Resubelpara ki don 3 tylli bad kitei baroh ki treikam.
U Myntri u la pynpaw ba na ka liang ka sorkar kan sa pyrshang ban pynbiang ia ki Dialysis Machine ha man la ki District Hospital Sorkar bad wat sha ki CHC ruh, khnang ban pynsuk shuh shuh ia ki nongpang ban ioh jingsumar kham kloi.
