Kum shi bynta na ka jingpynkhreh ia ka elekshon Lok Sabha u Chief Electoral Officer ka jylla u Dr. B.D.R. Tiwari mynta ka sngi ula pynlong ia ka jingialang bad u Commissioner and Secretary, Forest and Environment Department u Praveen Bakshi, IAS bad u Secretary ka Education Department u Ambrose Marak, IAS kum ka jingkyntiew ia ka Clean and Green Election hapoh ka jylla.
Ha kane ka jingialang u CEO ula pynpaw ia ka jingdonkam ban kyntiew ia kane ka elekshon Lok Sabha 2024 kum ka elkshon ba jyrngam (Green election). Ka ophis jong u CEO kan pynlong ia ka jingthung dieng ha baroh ki Polling Sation (PS) ha baroh ki bynta jong ka jylla. Ha kaba iadei bad kane yn ai ar tylli ki tynrai dieng sha ki nongthep vote ba nyngkong eh ha kino kino ki Polling Station u wei ia u shynrang bad u wei ia ka kynthei.
Namar ba kiba bun ki PS ki dei ha ki jaka pule, kumta u CEO ula kyntu ia ki bor pyniaid jong ka tnat pule puthi ba kan ai jingtip sha ki skul ba kin pynkdew ia ka jaka ban sat hung ia kine ki dieng bad kumjuh ban shimkhia ban pynheh pynsan ia ki.
Shuh shuh u CEO ula iathuh ba ka tnat Election kan sa pynkhreh ruh ban pynioh ia ki signboard bad ka jingiada ia ki dieng ba la dep thung. U CEO ula pynpaw ba ka long kaba donkam bha ban pynlong ia kane ka elekshon kaba lait na ka jingpyndonkam ia ki plastic lane ka jingpyndon ia ki plastic tang khyndiat eh bad ruh ka jingpyndonkam duna ia ki paper. Kane ka long katkum ka jingpyllait khubor na u Joint Chief Electoral Officer, Meghalaya bah Jonathan Shylla, MCS.
