U District Magistrate (DM), East Jaiñtia Hills District, ha ka hukum ba la pynmih katkum ka Section 163 BNSS u la pynjari ïa ka Night Curfew naduh ka por 8:00 PM haduh 6:00 A.M. ha ka jingjngai kaba 500 meter na u Zero Line (International Border) bad ka ri Bangladesh.
Ka hukum ka khang pyrshah ia ka jingleit jingwan jong ki briew ha u pud u sam bad ka ri Bangladesh lane ban rung beaiñ shapoh ka ri India, ka jingiaid proseshon khlem jingbit ne ka jingialang beaiñ jong ki 5 (san) ngut ne palat bad ki tiar pynmynsaw, kiwei kiwei ki tiar kiba lah ban pyndonkam kum ki tiar ialeh kynthup ia ki dieng bad ki maw bad ki maw.
La khang ia pyrshah ia kino kino ki kam be-ain, ka jingshalan tuh ia ki masi bad ki mar kum ki sohjew, ki dohkha tyrkhong, ki biri, ki sikret, ki slasha, bad kiwei kiwei.
U District Magistrate u la pyntip ba haba peit ïa ka jinglong jingman ha Bangladesh mynta, ka don ka jingma kaba lah ban mih na ka jingïaid lynti jong ki briew ba rung beaiñ, ki dkhot jong ki kynhun lehnoh, ki nongkhaii tuh bad kino kino ki kam be-aiñ ha khappud Indo-Bangladesh.
Kumjuh ruh, u District Magistrate u la pyntip shuh shuh ba ki dang don ki jaka khappud ha East Jaiñtia Hills District ki bym pat lah ban ker sainar shiah pura, kaba la wanrah ia ka jingwan rung tuh da ki nongwan buhai shnong be-aiñ, ki dkhot jong ki kynhun runar kiba don jingïadei bad ki kynhun pyrshah ri kynthup ïa ki kynhun lehnoh kiba don tiar pynmynsaw, kiba lah ban ïalum ha ki jaka khappud ha ka por mynmiet bad leh ia ki kam pyntriem jong ki.
Kumta ban teh lakam ia kine baroh la pynjari da kane ka kyndon 163 BNSS bad kane ka hukum kan treikam noh mardor naduh ba la pynmih ia ka tad haduh ban da pynmih da kumwei pat.