Ka National Cadet Corps (NCC) mynta ka sngi kala sdang ïa ka jingïaid rally da ki kali sha ki 7 tylli ki jylla hapoh ka thaiñ shatei lam mihngi (North East) ha ka jingjngai kaba 3500km, halor ka phang kaba ong ‘Navigating Challenges, Forging Leaders’.
Kum ban shu pynkynmaw ba ïa ka NCC la sdang ha ka 16 Apr 1948, lyngba ka kyndon aiñ jong ka Parliament bad la plie ïa ka ha ka 15 July 1948. La rakhe kyrpang ïa kane ka jingdap 75 snem da ka jingïaid rally da ki kali kaba 21 sngi naduh mynta ka sngi 6 tarik u Naiwieng haduh ka 26 Naiwieng 2023 ba kynjoh ïa ka jingjngai kaba 3500 Kms ïa kane ka jingïaid yn pynkut ha nongbah Guwahati.
Ha Jowai la rakhe ïa kane ka sngi ha Kiang Nangbah Govt. College Auditorium da kaba pdiang burom ïa u Major General Gagan Deep, ADG NCC ula long kum u kongsan ha ka jingwan ïuh kjat ba shipor jong u, haka jingdonlang ka Principal jong ka College Dr (Mrs) E.M. Blah, ki samla pule NCC, ki khynnah skul ki nonghikai nalor kiwei de.
Ia u Major General Gagan Deep la pdiang burom da ka ‘Salami’ da ki khynnah NCC jong ki ar tylli ki College kata ka Kiang Nangbah bad Thomas Jones Synod College.
Haba ai jingkren u Major General Gagan Deep ula pynsngew kaba donkam eh kum ki NCC ki dei ban don ka jingïatylli bad ka akor burom (Discipline) na ka bynta ban saiñdur ïa ka lawei ba phyrnai. U kyrmen ba kane ka jingïaid rally kaba la sdang na nongbah Shillong bad ban wan hiar ha Jowai shipor kan ïarap ban pynsngewthuh ïa ki samla pule ban rung hapoh ka NCC da ka nongrim kaba skem. La pynshong shit shuh shuh ïa kane ka prokram da ki jingrwai bad ki jingshad tynrai na ki khynnah NCC.
