Ki trai trok napoh Jaiñtia Hills kiba kit mar na ki kharkhana dewbilat mynta ka sngi 3 tarik u Rymphang kila lum ïa ka jingïalang ha ophis ka Kur Phawa Siangshai Papiah Lyngdoh Phawa kaba don ha Khliehwah Sahsniang, Ïalong West Jaiñtia Hills District ban ïakren ha kaba ïadei bad ki kam jong ka seng Jaiñtia Hills Truck Owners’ Association (JHTOA).
Hadien ka jingïalang na ka liang u ma Balen Thubru kum uwei na ki trai trok haka jingkren sha ki lad pathai khubor, ula ong kane ka dei ka jingïalang Pyllun jong ki malik trok bad kila shim ruh ïa ka rai ba haka 9 tarik u Rymphang, 2026 kin pynlong da ka jingïathep Vote ban jied ïa u President ba thymmai ka JHTOA.
Ula pyntip kino kino ki kyrtong kiba kwah ban ïakhun ïa kane ka Election President ki lah ban wan ïashim bynta ha katei ka sngi ha ryngkat ki Polling Agent jong ki, ka por kan sdang naduh 11 baje mynstep, haka juh ka por ïa kane ka Election yn pyntip sha ki bor sorkar ban pynïaid ïa ka bad ka jaka thep vote kan long ha kane ka jaka ba long meeting mynta ka sngi.
Kitei ki trai trok kila kyntu ïa u President ka JHTOA ba mynta ba un wan khnang sha kane ka jingïajied bad ki nongthep vote ki dei tang ki trai trok bad ki dei ban wanrah lang ïaki kot kali original kum ka Registration Certificate (RC). Ym shah ïa kino kino ki wan rah da ki kot dustabit thied kali, la ong u ma Balen.
