U MLA jong ka Ranikor Constituency Bah Pius Marwein uba dei ruh uwei na ki MLA ka South West Khasi Hills District (SWKHD) u la sei shibun ki mat jingdonkam jong ka konstitwensi ha ka Dorbar Mang Tyngka ka jylla kaba la iaid mynta sha ka sngi kaba 7, kynthup ka jingdonkam ia ki surok ha ka thaiñ SWKHD.
Ha katei ka jingioh kabu ban kren ha ka Dorbar, u Bah Pius nyngkong u la iaroh ia ka Sorkar khamtam ia u Myntri Rangbah ka jylla Conrad K. Sangma uba la wan hiar hi da lade sha ka Shnong Ranikor ha u bnai Kyllalyngkot 2025 na ka bynta ban iathir halor ka CM Connect bad khamtam ban sngap ia ka jingeh jong ki paidbah ka thaiñ SWKHD.
Kawei na ki mat ba une u MLA ka Ranikor u la pynsngew ka long shaphang ka jingdonkam ban ioh ia ki surok kiba kynthup na Wahkaji sha Ranikor ka ban pynsuk ruh ia ki paidbah ki ban leit donkam ha Ranikor Civil Sub division, nangta na Weiloi sha Mawkyrwat – Ranikor, na Weiloi Mawsynram – Balat – Ranikor, kaba kham kongsan ba u Bah Pius u la ban kadei na South West Khasi Hills sha West Khasi Hills namar ka don shibun ka jingmyntoi ha kaba ki paidbah ka SWKHD ki kham sngewjan ban iaid lyngba na Nongstoin (West Khasi Hills District WKHD) ban ia kaba leit sha Shillong lada donkam kano kano ka kam kyrkieh khamtam ha ka shitom ka pang, iathuh u Bah Pius. Nalor kata u la kdew ruh ia ka jingdonkam surok sha ka thaiñ Nongjri – Maweit, Raibah – Sarin, Mawjai – Nongummer, Wahkaji – Nongtnger – Mawthabah – Nongbahjynrin – Nongmalang, nangta sha ki thaiñ Nongkulang – Mawthengkut.
Shuh shuh u la pynpaw ruh ia ka jingangnud ba ka Sorkar Jylla kan shimkhia na ka bynta ban pynbha ia 25 tylli ki jingkieng kiba don ha ka Ranikor Constituency namar lyngba kine ki jingkieng ka pynsuk ia ka kamai kajih, ka kyntiew ia ka kam jong ki nongrep kiba iaid lyngba kitei ki jingkieng bad kan iarap ruh ban pynpoi ia ki nongpang ha kano kano ka por bad ha kano kano ka jaka.
U Bah Marwein u la khmih lynti ruh ba ka Sorkar kan lah ban kyntiew noh ia ka Ranikor Community Health Centre na ka 30 jingthiah sha ka 100 jingthiah namar ka Ranikor ka dei ka jaka long pdeng ia kiba bun tylli ki shnong, kumta ban buh tang 30 jingthiah ka la shem jingeh ia ki paidbah ka thaiñ, pynpaw u Bah Pius.