Ka jingïalehkai phutbol 1st Division bala pynïaid da ka East Jaiñtia Hills District Football Association (EJHDFA) kaba la long mynta ka sngi ha madan Deinchynrum, Khliehriat.
Haba phai sha ka jingïakhun ‘Quarter Final’ ba ar mynta ka sngi na ka liang ka kynhun ïalehkai jong ka Ladrymbai B. SC kala pynliem da 3-2 kol ïa ka R.Synrang Shahkhain SC, ïa ki kol na ka Ladrymbai la thep da u Dasukwame Dkhar haka minit ba 35, u Andreas Lyngdoh haka minit ba 49 lyngba ka (Penalty) bad u Salo Siangshai haka minit ba 68. Katba ïa ki kol na ka R.Synrang Shahkhain SC la thep da u Runald Dkhar haka minit ba 43 bad u Iaishah Bareh haka minit ba 90+1.
Ka jingïalehkai hapdeng kine ki ar kynhun naduh kaba sdang tad haduh kaba kut kala long kaba ïakhiad bah bad kaba la pynhun shisha ïa ki nongwan peitkai mynta ka sngi.
Ka jingïakhun ‘Quarter Final’ lashai ka sngi 18.10.2023 kan long hapdeng ka Rangad SC pyrshah ïa ka Khliehriat West FC haka por 2 baje nohphai sngi.
