Ha ka jingialehkai Football jong ki kynthei jop ka East Khasi Hills ia ka Ri-Bhoi, katba ki shynrang pynliem ka Ri-Bhoi ia ka East Khasi Hills

“Lashai kan poi sha kaba kut ka 6 Meghalaya Games ha Jowai“

Ha shwa ban poi sha kaba kut jong ka 6 Meghalaya Games la jan baroh ki jingialehkai bapher bapher jong ka Meghalaya Games ki la ialeh ia ka Final hynne ka sngi (24/01/2025). Ia ka jingialehkai Kynjatbol jong ka kynhun ki Shynrang bad ka Kynhun ki Kynthei la pynialeh hynne ka sngi ha Kiang Nangbah Stadium Dongmihsngi, Jowai hapdeng ka jingiphuh iphieng bad ka jingsawa ka sur jong ki Nongkyrshan ban kyrshan la ka liang ka liang.

            Ki Nongkyrshan kiba iengpyneh ryngiew la ka liang ka liang haba ki Nongialeh jong ka liang jong ki, ki ioh ia ka Bol ki Nongkyrshan ki pyrta “Ha Kol ha Kol” Haba ka wan ka Bol na ka liang pyrshah ki pyrta “ Sharud sharud”. Ha baroh artylli ki Kynhun jong ka Team ki Kynthei bad ka Team jong ki Shynrang ka long ka jingialeh kaba thaiñ bad kaba itynnat bha.

Ha ka Women Senior Final ka jingialehkai ka long hapdeng ka Team na Ribhoi bad ka Team na East Khasi Hills Disrict, ha kaba ka Team East Khasi Hills District ka la rah ia ka nam Champion ha ka Women Senior Final 6^th Meghalaya Games da shi 1-0 ia ka Team na Ribhoi District. Ka jinglah jong u Refree ma J. Shylla ban control ia ki Nongialehkai ha ryngkat ka jingiarap lang ka kong A. Wahlang, kong B. Lyngdoh bad ma B. Phawa, ka jinglehkai ka long kaba itynnat bad kaba iaid beit iaid ryntih haduh kaba kut.

Kumjuh ha ka jingialeh Final jong ka Team ki Shynrang hapdeng ka Kynhun na Ribhoi bad ka kynhun na East Khasi Hills ka la long kaba thaiñ bha bad kaba itynnat ha kaba ki Nongialehkai ki pyni ia ki sap ki phong ialehkai jong ki (energetic Talent) kaba pyniapngiah ia ki Nongpeitkai ban peit. Ha kane ka jingialeh ka kynhun na Ri-Bhoi ka la jop salit da shikol la not ia ka kynhun na East Khasi Hills.

            Ka jingialehkai ka long kaba shongshit bha na baroh arliang bad ka jinglah jong u Refree ma H.Hujon bad ka kynhun jong u, ma W.Pohtam, bah J. Syiemlieh bad bah E. Nongrum  ka jingialehkai ka long kaba itynnat haduh ba kut jong ka jingialehkai. Ha kane ka Final ka kynhun na Ri-Bhoi la jop da shikol la not ia ka kynhun na East Khasi Hills District.

            Na ka liang ki kynthei ha kane ka jijngialehkai bol jong ka 6^th Meghalaya Games ia ka Nam Best player la ioh rah da ka Miss Sanfida Nongrum bad na ka liang ki shynrang la iohrah da u Defender Sylliang.

            U kongsan ha kane ka sngi, u bah Shakliar Warjri, u Myntri ba dei peit ia ki kam ialehkai bad u ma Richard B. Uriah, Principal ka North Liberty Higher Secondary School u Symbud Kongsan. Ia ki Medal sha ki Nongialehkai la sam da u bah Clip Nongrum bad ia ki Trophy sha ki Nongjop la sam da u ma Richard Uriah bad u bah Shakliar Warjri.            

Ban pynkut ia ka 6^th Meghalaya Games lashai ka sngi 25/01/2025, kan long ha Kiang Nangbah Stadium, Jowai.