Ka Lehniam shad Behdeinkhlam ka Sein Raij Jowai kaba ju long manla u snem, mynta u snem ruh ia kane ka lehniam kaba kongsan bad kaba iphuh iphieng jong ki Pnar kiba dang bat ia ka niam tynrai ka Niamtre ha Jowai, kala sdang naduh ka 30 tarik June bad kut noh mynta ka sngi 3 tarik July hapdeng ka jingshongshit shongkun bad ka jingiphuh iphieng.
Mynta ka sngi la wan ban sakhi ia kane ka lehniam Behdieñkhlam da u myntri ka jylla Meghalaya u Conrad K Sangma uba long kum u kongsan, u myntri ka tnat Arts & Culture bah Paul Lyngdoh, MLA ka Jowai u ma Wailadmiki Shylla, ma Sanbor Shullai MLA, ka MLA Sutnga-Saipung kong Santamarry Shylla, ma T. Shiwat CEM JHADC, ki Doloi na ki Elaka bapher jong ka Jaintia, SP, DC, WJHD, ki MDC JHADC, ki nongwan jngohkai pyrthei na kiwei pat ki ri ryngkat da ki hajar ki paidbah na kylleng.
Ka bynta ba kongsan tam ka Lehniam ka la sdang ha ka nohphai sngi ha Aitnar- ka pung bakyntang. Ha kane ka jaka ka Behdieñkhlam kala sdang da ka jingwan ki Wasan hapoh ka jingialam u Pator ban pynlong ia ka nguh ka dem ia ka Syiem Aitnar bud pat sha ka jingwanpoi ka Symbud Khnong Blai. Hadien ka jingwan poi ka Symbud Khnong Blai, ki khon ka Niamtre ki la hiar ban shad ha katei ka pung ba kyntang.
Ki dong bapher bapher kynthup ia ka Panaliar, Dulong, Chilliangraij, Loomiongkjam, Loomkyrwiang, Iongpiah nalor ka Sein Raij Shillong, Sein Raij Ummulong bad Ka Sein Tylli Niamtre Ladthadlaboh, Seng Khasi ki la wanrah ia 12 tylli ki rot jong ki ha ki dur ba harukom ha ryngkat ka khubor sha ki paidbah.
Na ka liang u Myntri Rangbah ka jylla u Conrad K Sangma, u la ai khublei kyrpang bad kitbok kit rwiang ia ki khun ka Seiñ Raij Jowai bad ia ka jait bynriew hi baroh kawei ba kin ioh ka koit ka khiah ka kamai kajih ba dap ba biang ha une u snem baroh shilynter.
