Ka Shad Suk Mynsiem ka dei ka jingshad kaba ju rakhe man la u snem da ka Seng Khasi Seng Kmie. Kane ka jingshad ka dak ban pyni ia ka jingsuk, ka jingsngewnguh, bad ka jingiatylli, bad ka don ia ka tynrai kaba pyni ia ka jing riewspah jong ka jaitbynriew Khasi.
Haba kren sha ki lad pathai khubor, u Bah P.D. Nongrum, Vice President ka Seng Khasi Seng Kmie, u la ïathuh ba ïa ka Shad Suk Mynsiem la rakhe nyngkong eh ha u snem 1911 bad mynta u snem ka dei ka jingdap 114 snem jong ka jingpynlong ïa kane ka shad suk mynsiem. U la pynpaw ka jingsngewnguh ia U Blei na ka bynta ki jingkyrkhu kiba la ioh bad u la ai ruh ki jingduwai na ka bynta ka roi ka par ha u snem ban wan.
U Bah Nongrum u la kdew ruh ba kiba bun ki nongiashim bynta ha kane ka jingshad ki dei kiba bud ia ka jingngeit Khasi. La sdang da ki jingduwai, ban kyrpad ia ki jingkyrkhu kyrdoh ba kane ka sngi kan long kaba iaid beit iaid ryntih.
Na ka liang ka Dr. Herina Dohtdong kaba dei ka dkhot jong ka Jylli Pyrkhat Kam Seng Khasi haba kren bad ki Nongthoh khubor ka la ong na ka shad ka kheiñ ka iaid ryngkat bad ka niam ka rukom. Ka la ban jur ba naduh ba u khunlung u don ha kpoh ka kmie, lyngba ka jingkha, ka jingshongkurim, bad haduh ka jingiap, ki jingainguh bad ki jingduwai sha U Blei ka don kane ka pynpaw ia ka jingngeit bad jingaiti lut.
Ha ka sngi kaba khatduh jong ka tamasa la sakhi da ki spah ngut ki shynrang bad kynthei kiba la riam da ki riam tynrai Khasi, da ka jingkmen ki la ïashim bynta ha ka jingshad kynthei bad Shynrang. Ha kane ka jingshad, la tem la pud da ki tiar tem tynrai khasi, ka pyni ia ka jingiatylli, ka jingsngewbha, bad ka jingiadei kaba jylliew hapdeng ki briew bad ka mariang.
Ki riew pawkhmat ba kynthup ia u Myntri Rangbah ka Jylla u Conrad K Sangma, u Symbud Myntri Rangbah ka Jylla u Bah Prestone Tynsong, ki Myntri Sorkar, ki MLA u MP bad kiwei kiwei ki la ia donlang ban sakhi ia kane ka jingrakhe.
