Ka Shad Sukra ka Seiñ Raij Mukhla kala poi noh sha kaba kut hynnin ka sngi 1 tarik u Ïaïong, ha kaba la wan ban sakhi lang da ka kongsan ka kong Santa Mary Shylla MLA ka 5-Sutnga Saipung Constituency ha ryngkat u ma Wailadmiki Shylla MLA 2 Jowai kum u symbud kongsan nalor kiwei kiwei de.
La pynphuh pynphieng ïa kane ka Shad Sukra da ki jingshad tynrai ba la shim bynta da ki khun ka Seiñ Raij Mukhla kiba la tem lang da ka ksing, klornet, harmony. La ïathuh ruh ki nongwan ïashim bynta ha kane ka Shad Sukra ka Seiñ Raij Mukhla kila doh haduh kumba 380 ngut na ki 38 tylli ki kynhun shad na ki 4 tylli ki Dorbar Shnong hapoh Mukhla Pyllun kiwa hap hapoh ka jingpait ka Seiñ Raij Mukhla.
Hashwa ban sdang ka Shad Sukra la pynlong ïa ka jingïalang ba la pynïaid da u ma Airforce Suna Vice President Seiñ Raij Mukhla, la ïoh ïa ka nguh ka dem na u Pa Langdoh Niam ka Raij Mukhla u Wanbha Lyngdoh bad la pynher ruh ïa ka lama ka Seiñ Raij Mukhla da ka kong Santa Mary Shylla MLA.
Kiwei de kiba ai jingkren ki kynthup ïa u Pynshai Sjylla Waheh Shnong, Mukhla Umlangshor, u Tiplem Sumer General Secretary Seiñ Raij Mukhla, u ma Standbyme Sari General Secretary Dorbar Shnong Mukhla Nongrim, u Wom Chyrmang President Seiñ Kyntu Seiñ Raij 12 Daloi, na u Ailad Bhoi Local MDC, na u Wailadmiki Shylla local MLA, na ka kongsan Kong Santa Mary Shylla MLA, katba ïa ki kyntien khublei la ai da u Buhlut Suna Waheh Shnong Mukhla Nongrim.
La wan ban pynshong shit ïa kane ka Shad Sukra ka Seiñ Raij Mukhla da ki President/Secretary ki Seiñ Raij bapher bapher na ka Sengkhihlang, Seiñ Kyntu Seiñ Raij 12 Daloi, ka Seiñ Raij Latymphu, Seiñ Raij kongwasan Chyrmang, na ka liang ki saheh Sorkor napoh ka District kiba ïadonlang kynthup ïa u ma C. Syrti Superintended of Police West Jaiñtia Hills District bad kiwei de.
Ïa kani ka Shad Sukra jong ki khun ka Seiñ Raij Mukhla la ju leh manla u snem ha chwa ban hiar rep hiar riang sha ki hali ki pynthor bad ban bet ïa u khaw u kba, kane ka long ruh shi bynta ban ainguh ïa ka mei mariang kaba long ka nongpyndap pynbiang ïa u khun bynriew bad ha ka juh ka por ka long ruh kum ka lad ban pynneh pynsah ïa ka Dustur ka Riti jong ki Pnar.
Ha kani ka sngi la pynkup burom ïa u Wailadmiki Shylla MLA 2 Jowai Constituncy u khun ka Seiñ Raij Mukhla uba la jop 2 Sien kum u MLA, kumjuh la pynkup burom ïa u ma Phrang Pale Executive Engineer NEC na ka Seiñ Raij Ialong. Kane ka long katkum ka kyrwoh ba la phah da u ma Standbyme Sari Auditor ka Seiñ Raij Mukhla.
