Ka kynhun myntri jong ka sorkar pdeng kala pdiang ia ka projek kaba shongdor haduh Rs.22,864 klur ia kaba la mang da ka Cabinet Committee on Economic Affairs (CCEA) na ka bynta ban shna ia ka surokbah ba la ai kyrteng kum ka Shillong-Silchar Greenfield High-Speed Corridor.
Kane ka surok kan don ia ka jingjngai (jingjrong) kaba 166.80 Km, ia kaba yn sdang ia ka na ka shnong Mawlyngkhung hajan ka nongbah Shillong bad kan kut haduh ka shnong Panchgram hajan ka nongbah Silchar.
Kumba 144.8 Km kane ka surok kan iaid napoh ka jylla Meghalaya kaba tam nangta kan hap hapoh ka jylla Assam.
Ka jingdon jong kane ka surok bah kan iarap shibun ban pyniasoh ia ka nongbah Shillong, ka Silchar, Guwahiti bad kiwei pat ki jylla jong ka thaiñ shatei lam mihngi. La khmih lynti ba kan iarap ruh ban kyntiew ia ki kam jngohkai pyrthei bad ka jingkiew ha ki kam karkhana. Nalor kata kan pyniasoh ruh ia ki kat liengsuiñ jong ka Shillong, Guwahati bad Silchar.
La pyntip ba lyngba ka jingpyntrei ia kane ka surok bah kan pynioh jingtrei haduh 137 lak ngut ki nongtrei.
Na ka liang jong u Myntri Rangbah ka jylla u Conrad K Sangma ula pynpaw ka jingsngewnguh kaba khraw ia u Myntri Rangbahduh ka ri India u Narendra Modi halor kane ka jingiohi jngai jong u na ka bynta ka jylla bad ka thaiñ Shatei lam mihngi ka ri India.
