Ka National People’s Party (NPP) mynta ka sngi ka la rakhe ia ka sngi dap snem ba 12 jong ka Party ha nongbah Shillong ha U Soso Tham Auditorium.
Ha kane ka sngi la don ryngkat da u National President ka Party u Conrad K Sangma, u bah Prestone Tyngsong, ki MLA jong ka Party NPP, ki MDC bad kiwei kiwei ki Nongkitkam jong ka party.
Utei u nongïalam ka Party u la pynpaw ïa ka jingsngewnguh ïa kitei ki dkhot kiba la aiti lut iala ka buit ka bor bad ka jingshemphang ban seng ia ka National People Party NPP naduh kaba Sdang.
Haba kren ha kane ka sngi u Conrad Sangma u la pdiang sngewbha ïa ki dkhot bad ki nongïalam ba thymmai kiba la rung sha ka party, da kaba ban jur ba baroh ki dei ki bynta jong ka longïing jong ka NPP. U la ban jur ba kam don kano kano ka jingïapher hapdeng ki dkhot kiba rim bad kiba thymmai bad ba uwei pa uwei u briew shimet u dei uba kongsan ïa ka party.
U la pynshlur ia ki dkhot jong ka party ba kin shakri hok ia ki paidbah, ym ban ioh jingmyntoi shimet ne ka kyrdan ka burom la jong. U la ban jur ia ka jingdonkam jong ka jinglong babha, ka jingiatylli, bad ka jingsngewrit ha ka saiñ pyrthei, bad u la kyntu ia ki dkhot ban kiar na ka saiñ pyrthei kaba pyniakhlad bad kaba pynsniew.
Khatduh eh u la pynpaw ka jingsngewnguh ïa ki paralok ba ïatreilang jong ka party bad u la ban jur ïa ka jingdonkam ban ïatreilang ban kyntiew ïa ka jylla shakhmat.
