Ka District Level Youth Exchange kaba ar sngi lynter kaba la pynlong da ka ophis jong ka District Sports Officer (DSO), East Jaiñtia Hills District halor ka phang “Today’s Youth, Tomorrow’s Leader”, ka la poi sha kaba kut mynta ka sngi 24.10.2024, ia kaba la pynlong ha Khliehriat West Community Hall, Khliehriat.
Ha ka prokram la wan ban sakhi lang da u Sub-Divisional Officer (Sadar), East Jaiñtia Hills District, u Aditya Verma kum u kongsan ha ka jingïadon lang u Block Development Officer, Khliehriat C&RD Block Dr. T Shylla, DSEO-EJHD kong A.P Syiem, District Sports Officer (DSO) EJHD kong S.M Rapsang, District Public Relations Officer, EJHD bah E.S War, ki heh sorkar, ki nonghikai bad ki khynnah skul.
Haba kren ha kane ka sngi pynkut, u SDO Aditya Verma, u la batai halor ka phang pdeng jong kane ka prokram, da kaba khot bad kyntu ia ki samla pule ba kin long kiba angnud ban don ka jing phohsniew kaba iar ha ka jingim jong ki, u la ong ruh ba kano kano ka kam lah ban ioh ha ka jingim jong ki samla lyngba ka jingtrei shitom, da ka jinglong kaba beit bad ka jingaiti lut sha ka thong kaba la mang haka jingim jong ki. Shuh shuh nalor kata, u la pynpaw ruh ba ym don jingbuh kyndon ïa ka rta na ka bynta uno ne kano kiba kwah ban long nongïalam ha ka imlang sahlang bad u la kyntu ïa ki samla pule ban don ïa kata ka jingpyrkhat kaba bha.
Ha kane ka program kaba ar sngi, kaba long ruh kum ka jingkyntiew ïa ki sap ki phong jong ki samla, la don ki jingïakop bapher bapher kiba kynthup ïa ka jingiakop jingrwai tynrai, jingshad tynrai, science mela, ka jingthoh poetry bad jingiathukhana, jingiakop Quiz, iakop drodur bad kiwei de ki jingïakop.
Ha ka jingiakop thoh khana, ka Wanda Phi Pala na Jaiñtia Eastern College ka la ioh ia ka nam ba nyngkong katba ka Nisha Shylla na Jaiñtia Eastern College bad ka Mewari Gympad na ka Star Public School ki la ioh ia ka nam ba ar bad ba lai.
Ha ka jingiakop Declamation ka Juliana Lyngdoh na Jaiñtia Eastern College ka la rah ïa ka nam ba nyngkong, ka PynhunlangIa-I Syih na Jaiñtia Eastern College ka la ioh ïa ka nam ba ar katba ka Gloria K Gympad na ka Good Shepherd Higher Secondary School ka la ioh rah ïa ka nam ba lai. Ha ka jingiakop thoh poitri, ka Wanda Phi Pala na Jaiñtia Eastern College ka la ioh ia ka nam ba nyngkong, ka Avirginia Dkhar na Jaiñtia Eastern College ka la ioh ia ka nam ba ar katba ka Well Born Phawa na Sein Jait Tuber Higher Secondary School ka la ioh ia ka nam ba lai.
Ha ka jingiakop dro dur, u Brightstar Dkhar na Don Bosco College u la ioh ia ka nam ba nyngkong, ka Gloria Chyrmang na ka Gracious Disciples ka la ioh ia ka nam ba ar bad u Bikram Magar na Jaiñtia Eastern College u la ioh ia ka nam ba lai.
Ha ka Science Mela u Rangdajied Sympli bad ka Biki Boro na Jaiñtia Eastern College ki la wan ba nyngkong katba ka Alisha Dkhar bad ka Lightning Sumer na Jaiñtia Eastern College kila wan ba ar.
Ha ka jingiakop Solo Folk Song, ïa ka nam ba nyngkong la ïoh ban khur da ka skul jong ka Good Shepherd Higher Secondary School, ïa ka nam ba ar la ioh da ka Star Public School katba ïa ka nam ba lai la ïoh da ka Sein Jait Tuber Higher Secondary School.
Ha ka jingiakop Folk Song (Group Category), ïa ka nam ba nyngkong la rah da ka Sein Jait Tuber Higher Secondary School, ïa ka nam ba ar la rah da ka Good Shepherd Higher Secondary School bad ïa ka nam ba lai la ïoh da ka Jaiñtia Eastern College.
Ha ka jingiakop shad Solo (Folk Dance), ia ka nam ba nyngkong la ioh ban khur da ki samla pule jong ka Jaiñtia Eastern College katba ia ka nam ba ar la ioh ban khur da ka Sein Jait Tuber Higher Secondary School. Ha ka jinjgiakop Group Folk Dance, ïa ka nam ba nyngkong la rah da ka Good Shepherd Higher Secondary School katba ïa ka nam ba ar bad ba lai la rah da ka Ephatha Society bad ka Sein Jait Tuber Higher Secondary School.
Ha ka jingïakob Quiz ka Jaiñtia Eastern College kum ka nongjop katba ka Star Public School bad ka Don Bosco College, Byndihati ki la ioh ia first bad second runners up.