Ka Khun Hynniewtrep National Awakening Movement (KHNAM ) mynta ka sngi ka 11 tarik Nohprah 2024 ka la leit buh da ka dorkhas sha ka ophis Labour halor ka jingmih ka hukum ba pynkiew ka Sorkar tang 2 tyngka ia ka Bai bylla sngi.
Haba kren sha ki lad pathai khubor, u Bah Thomas u la ong katkum ka Notification ba pynmih da ka sorkar ba kan pyntreikam ia ka jingpynkiew bai bylla sngi naduh u Risaw, 2024 kata 419 tyngka ia ki Unskilled, 474 tyngka ia ki Semi Skilled, 530 tyngka ia ki Skilled bad 586 tyngka ia ki Highly Skilled.
Shuh shuh u Bah Thomas passah u kynthoh tyngeh ia ka tnad labour ba ha shwa ba kan pynkiew ia ka bai bylla sngi, ka sorkar ka khlem da wad bniah ia ka jingkiew dor ki marbam mar dih ha iew ha hat, ka dor 2 tyngka kam iahap eiei ruh em ha kane ka juk ba mynta na ka bynta ki paidbah kiba im ja da ka Dor ba rit kiba trei ha ki tnad sorkar lane ki ophis private namarba ka jingkiew dor ki marbam ka lah nang kiew na kawei ka por sha kawei ka por.
U la ong ba ka jingpynkiew bai bylla ha u bnai Iaiong, 2024 lyngba ka tnad ka long 417 tyngka ia ki Unskilled, 472 tyngka ia ki Semi Skilled, 527 tyngka ia ki Skilled bad 583 tyngka ia ki Highly Skilled bad kumta ka don jingiapher tang 2 bad 3 tyngka.