Ka Mawlai SC ka la pyni pyrthei ia ka sap bad ka jingtrei shitom ka kynhun baroh kawei da kaba rah ia ka nam Lahduh jong ka lympung Meghalaya State League (MSL) 2024-25 hadien ba ka la lah ban pynliem ia ka klob ba radbah na kane ka Nongbah, ka Shillong Lajong FC lyngba ka penalty.
Ha katei ka jingiakhun phainal ba la pynlong ha madan Wahiajer Multi-purpose Sports Complex la wan ban don ryngkat ruh da u Symbud Myntri Rangbah ka jylla, Bah Sniawbhalang Dhar, Bah Hamlet Dohling President ka Meghalaya Football Association (MFA), ki Nongïalam Shnong, dkhot ka MFA bad kiwei kiwei.
Ym lah ban len ba ka Mawlai ka dei ka klob kaba kiew bha ha kine ki 3 snem bad lyngba ka jingioh ban soi ia ki snar ïalehkai bapher bapher kiba na kane ka Jylla, la sakhi ia ka jingkiew sted, ka jingiatylli bad ka jingiaineh ha ka buit ialehkai, kata ha baroh ki lympung, kynthup ha ka lympung Shillong Premier League (SPL).
Kane ka kynhun ka dei ruh ka lahduh jong ka lympung SPL 2 snem lynter (2022-23, 2023-24) bad haduh kane ka khyllipmap ka dang don ha ka kyrdan ba nyngkong na 11 sien ki jingialehkai.
Lah ban ong ruh da ka jingtikna ba kane ka kynhun kan ioh ban rah biang ia ka nam Lahduh ba 3 lada ka dang lah ban iaineh ha ka rukom ialehkai kumba ka long hynne ka sngi.
Haba phai sha katei ka jingiakhun phainal, la sakhi ba ka jingiakhun ka long kaba jwat bad kaba itynnad. Baroh 2 kynhun ki la angnud ban ioh pynkhih jar hapoh ka 90 minit ba la buh hynrei na ka jingiabiang bor ka jingiakhun ka la ïakhaid da 0-0 kol wat hadien ba la ai da ka extra time (15+15). Ban bishar katkum ka rukom passing, ka Mawlai ka kham tam poiñ bad kham iohi kabu hynrei namar ka jingskhem ki rangialehkai ba shadien (defender) ka Lajong, ka Mawlai kam ioh lad satia ban thep kol.
Na ka jingioh kabu lyngba ka penalty, ka Mawlai ka la jop da 5-4 kol bad rah ia ka nam Lahduh ba nyngkong tam eh jong kane ka lympung ba heh tam ha ka jylla ryngkat ka song Pisa kaba 5 lak bad 3 lak sha ka Lajong kaba la wan ba ar ha kane ka lympung.