Ka Meghalaya Arts and Culture kaba dei ka tnad ba khmih ia ka pud ka tem, ka rwai ka siaw ha ka jylla ka dang ïai bteng ban wanrah ia ki nongrwai ba paw ka pyrthei na ka bynta ban kyntiew bad ai mynsiem ia ki samla. Ha kane ka kynti ruh la rai ba kin khot ia kynhun rwai Boney M ban rwai ha ka ‘Cherry Blossom Festival’ ha ka 15 bad 16 tarik u Naiwieng mynta u snem.
Ki nongrwai Boney M kidei ki nongrwai ba la ioh bha ia ka jingithuh ha ka jylla baroh kawei. Lah ban ong ruh naduh ki khynnah haduh rangbah ki dang sngap ia ka jingrwai jong kane ka kynhun haduh mynta. Ym lah ban len ba ka jingrwai Khrimas (Mary’s Boy Child)Oh my Lord) ba la pynmih ha ka snem 1978 kadei kawei na ka jingrwai ba ka iaid bha ha kine ki jaka Ri-lum.
Kane ka kynhun ka la shim ruh ia ka rai ba ban pynkut ia ka jingiaid lynti kum ka kynhun ha kane ka nongbah, kata hadien 48 snem ba ki la don lang kum ka kynhun bad la ong ruh ba kan dei ka sien ba nyngkong bad ka sien ba khatduh ban kin wan rwai ha Shillong.