Ka kynhun jong ki samla kaba la tip kum ka Jaiñtia Phtographers and Videographers Association (JPVA), mynta ka sngi nyngkong ka 9.03.2026, ka la pynlong ia ka jingiakop shon dur ne kaba la tip kum ka Street Photography Contest, ha nongbah Jowai, ha kane ka jingiakop shibun ngut ki samla kiba don ka sap ka phong ha ki kam shondur ki la wan ban ia shim bynta sha kane ka jingiakop.
Hadien ka jingiakop la pynlong ia ka jingialang ha rud jong ka Nan Kashari kaba don ha Iawmusiang, na ka bynta ban sam ia ka khusnam sha ki nongjop ha kane ka jingiakop. La ioh ruh ki jingbatai na ki riewshem phang ha ka jingiadei bad kane ka jait kam kaba dei kawei na ki lada kamai kajih khamtam ha kine ki por ba kyrduh kam kyduh jam.
Na ka liang u Kongsan ha kane ka programme u ma Medalin Swer, MDC ka 1-War East, uba long ruh u EM JHADC, haba ai jingkren u la iaroh ia kane ka kynhun kaba la wad kum kane ka lad kaba long kawei na ki kam kaba donkam bha mynta ki sngi. U la pynkynmaw ba haba don kano kano ka jingkhawai dawai ne ki kam ba don kam dei ban don ki nongshondur na ka bynta ban pynsah jingkynmaw.
Ha kane ka jingiakop shon dur ha ka liang ka Mobile category ia ka kyrdan nyngkong la ioh rah da u Pormi Shylla, ba-ar da u Lomin saindurmiki Dkhar bad ba-lai da u Chanmi Chullai. Katba ha ka kyrdan camera (DSLR) ha ka kyrdan ba nyngkong la jop da u Dakermi Talang, ba-ar da u Dawan pynsuk Sateiñ bad ba-lai da u John L E Nongpluh.
Ia ki nongjop la sam da ki Certificate ryngkat ka song pisa, ia kiba la sam da u kongsan ma M. Swer bad kiwei de ki rangbah kiba la shah khot sngewbha.
Ha kane ka sngi la don lang ruh u Lambormi Suchen na ka Skill Development (MSSDS), Vice President JPVA ma Ruhi Phawa, ma HH Mohrmen, ma CH Passsah bad kiwei de.
Hadien kane ka program ha ka janmiet pat la don ka tem ka put ryngkat ka jingiatrei lang bad ka CM MGMP.
