Ka Krishi Vigyan Kendra (KVK) Jaiñtia Hills, ha ryngkat ka ICAR, Umiam mynta ka sngi 10 tarik u Jylliew kaba dei ka sngi ba khadar (12) na ka prokram ‘Viksit Krishi Sankalp Abhiyan’ (VKSA) kila bteng ban leit ai jinghikai ïa ki nongrep ka Jaiñtia Hills kaba kynthup ïa ki 9 tylli ki shnong kiba hap hapoh ka Thadlaskeiñ Block bad Laskeiñ Block.
Kine ki shnong ha Thadlaskeiñ C&RD Block ki kynthup ïa ka Umladang, Mookbu, Rakabah, Umjalasiaw, Mukhnang bad Khonsaro. Katba ha Laskeiñ Block kynthup ïaka Mulieh, Pammanik, Shangpung Muktung. Baroh ki nongrep kiba la wan ïashim bynta ki don haduh 867 ngut. Na ka liang ki dkhot ka KVK kiba leit ban ai jinghikai sha ki nongrep la pynbynta ha ki laitylli ki kynhun ha ryngkat ka jingdonlang ki Scientist, ki ophisar bad ki nongtrei ka tnad ka rep ka riang.
Ha kane ka prokram, la ai jinghikai ïa ki nongrep naduh ka rukom rep ïa ki jaitsoh, ka rukom ai dawai ïa ki jingthung ka rukom pynïaid ïew ïa ki mar rep, ka rukom ri ïa ki jingri, nalor kiwei kiwei de kiba long katkum ka jinghikai jong ka juk stad mynta (technology).
La batai ruh shaphang ki skim bapher bapher jong ki nongrep kiba lah ban ïoh naka sorkar kum ka Crop Insurance Scheme, PM KISAN, Soil Health Card,Vegetable Development Scheme, Fruit Development Scheme, Spice DevelopmentScheme, CM-Assured Scheme,PMFME Scheme, MOVCD-NER, MIDH, PMKSY (PDMC), nalor kiwei de ki skim kiba lah ban ïoh jingïarap.
