Ka lympung ïalehkai phutbol kaba la tip kum ka Republic Day Cup, Under-13 Football Tournament 2024 bala pynïaid da ka West Jaiñtia District Sports Association, (WJDSA) Jowai mynta ka sngi kala jam sha ka jingïakhun jong ka sngi ba ar ha madan Kiang Nangbah Stadium Dongmihsngi, Jowai .
Haba phai sha ka jingïakhun ba nyngkong ka Iawmulong Nartiang kala pynliem da 4-0 kol ïa ka Chilliangraij, ïa ki kol na ka Iawmulong Nartiang la thep da u Y Maskut haka minit ba 7, u M Maskut haka minit ba 25 bad u K. Pyrtuh haka minit ba 42 & 47. Katba ka kynhun Kseh Sylle SC kala pynliem da 3-0 kol ïa ka Lumkyrwiang SC, ïa ki kol na ka Kseh Sylle SC la thep da u Khainmi Pale haka minit ba 22, u Emihashwa Dhar haka minit ba 50 bad u Rijuban Dhar haka minit ba 53.
Ha ka jingïakhun kaba ar ka Iawmusiang Nangbah kala pynliem da 1-0 kol ïa ka Luti tuber, ïa katei ka shikol na ka Iawmusiang Nangbah la thep da u Kyrkhumitre Lamare haka minit ba 42. Katba ka kynhun Catholic Youth kala lah ban pynliem da 1-0 kol ïa ka FAM, ïa ka shi kol na ka Catholic Youth la thep da u Wandame Pahwa haka minit ba 27.
Ha ka jingïakhun kaba lai hapdeng ka Chutwakhu pyrshah ïa ka Mynthong kila poi sha ka jingïakhaid da mar shokol (1-1). Ïa ka kol na ka Chutwakhu la thep da u Yokhain Pyrtuh haka minit ba 29, na ka liang ka Mynthong la thep da u Jomison Shylla haka minit ba 5. Katba ka kynhun jong ka Panaliar kala pynliem da 4-2 kol ïa ka Dulong, ïa ki kol na ka Panaliar la thep da u Sawa o Phira haka minit ba 9 & 22 bad u Lewa o Sumer haka minit ba 50 & 52. Ïa ki kol na ka Dulong la thep da u Ozil Langshiang haka minit ba 55 & 60.
La pyntip ba ka jingïalehkai ka bteng lashai ka sngi 10 tarik naduh ka por 9 bajer mynstep ha kaba yn pynïakhuh haduh 6 tylli ki match.