Ka sngi ba nyngkong jong ka jingsdang ka Shad Behdieñkhlam kaba hap hapoh ki ‘saw sngi lai miet’ ka la sdang naduh mynta ka sngi Pynsiñ ka 30 tarik u Jylliew kala long kaba ïaid beit ïaid rynti ha ryngkat ka phuh phieng hapdeng ka jingrisa bad ka jingud ka Bom ka Bhuri kaba la shim bynta da ki khun ka Chilliang Raij (Khon Raij) kiba la leit rah na khlaw ïa ka “Symbood Khnong” bad pynpoi ïa ka ha ‘Tre Kjat Loomsooïung’ New Hill Jowai.
Ïa ka shad Behdieñkhlam mynta ka sngi la sdang naduh ka por mynstep ba la don ka bam Tyngkong ha ‘ïung Langdoh’ nangta ki khun ka Seiñraij Jowai kila pynkhreh ïa ka Siang ka Pha ban pyndep da ka kmie jong ka ïing kum ka jingburom ïa ki mynsiew jong ki dkhot ka ïing kiba la khlad na sla jong kane ka pyrthei.
Katba ha ka por janmiet ki khun ka Chilliang Raij (Khon Raij) kila leit rah na khlaw ïa ka “Symbood Khnong” ha ryngkat ka shad ka kmen, ka pud ka tem ha shi lynter lynti haduh ban da poi ha New Hill, Loo Soo ïung, Jowai.
Lashai ka sngi ba ar kaba dei ka ‘Mulong’ jong ka 1 tarik u Naitung naduh ka por mynstep u Dolloi, u Langdoh bad ki Waheh Wasan kin sdang ïa ka nguh ka dem ha ka “Syiem Aitnar” hapoh ka jingpynlut pynsep jong u Dolloi.
Ha ka por janmiet baroh ki Kmai Raij naduh ka dong Panaliar, Dulong, Lumpyrdi ïongpiah, Lumïongkjam, Tpep-Pale, Lumkyrwiang kin pynpoi ïa ki Deingkhlam ha Iawmusiang. Hadien kata ki Kmai Raij kin leit shaw ïa ki Khon Raij ban leit pynpoi ïa ka ‘Khnong Blai’ ha Loom Soo ïung.
