Ka jingjied President kaba 16 jong ka ri India kan long ha ka sngi Nyngkong jong ka taiew ban wan (18/07/2022) ha kylleng ki bynta jong ka ri India bad ka jingniew vote pat kan long ha ka 21/07/2022.
Ha kaba iadei bad kane ka kam jied President na ka liang ki bor pyniaid Election jong ka ri India kila pynpoi ia ka synduk thep vote ne ka Ballot Box hynnin ka sngi ha nongbah Shillong. Ia kane ka synduk la pynpoi lyngba ka liengsuiñ haduh ha nongbah Guwahati bad la shimti pat ia kane ka Synduk bad kiwei de ki kot ki sla bad ki tiar ba donkam da ki bor pyniaid jong ka Meghalaya.
Ia kane ka Ballot Box bad ki tiar ba donkam la buh ha Strong Room jong ka Meghalaya Legislative Assembly, Shillong. Ha kaba na ka liang jong u Chief Electoral Officer ka jylla u bah F.R. Kharkongor ula khang tala ia kane ka kamra bad ati pat ia u shabi ha i ARO jong ka Meghalaya Assembly Secretariat hynnin hi ka sngi.
Kum ban shu pynkynmaw ba ka samoi treikam jong u President ba mynta ka ri India u Ram Nath Kovind kan kut noh ha ka 25 tarik mynta u bnai hadien ka jingbat kam ba 5 snem jong u kata naduh ka 25/July/2017.
Ki kyrtong ki ban iakhun ia ka shuki President mynta ka kynti ki long ka Draupadi Murmu na ka Party BJP bad yn kyrshan ia ka da ka sorkar NDA bad u Yashwant Sinha na ka Party AITC ban kyrshan na ka liang pyrshah.
