Ka Dorbar Shnong Nongkhroh West Jaiñtia Hills District mynta ka sngi 17 tarik u Kyllalyngkot 2025 kala ïoh ïaka ‘Community Hall Nongkhroh’ ba thymmai ne ka ïing Dorbar, ïa kaba la wan ban plie paidbah da u MLA ka thaiñ uba dei ruh u Symbud Myntri Rangbah ka sorkar jylla u ma Sniawbhalang Dhar.
U ma Sniawbhalang Dhar ula ong ka jingurlong ban ïoh ïa kane ka ïing Dorbar ka dei da ka jingïatylli lang jong baroh ki nongshnong shnong ka Nongkhroh, ula ai ruh ka jingïaroh ïa u Waheh Shnong ka Nongkhroh uba don shisha ïa ka mynsiem trei shitom na ka bynta ka shnong ka tnaw.
Kum u MLA jong kane ka thaiñ u don ka jingkitkhieh naka bynta kane ka shnong kaba hap hapoh ka Constituency jong u bad kaba la pynjop don burom ïa u ha kine term ban long kum u MLA. Ula ong wat ïa ka surok ban poi sha kane ka shnong na ka liang jong u, ula pynbna haduh 3 klur tyngka ban pynshna noh ïa u surok ha kine ki khyndiat bnai.
Ha kaba ïadei bad ka pule ka puthi hapoh jong katei ka shnong u ma Sniawbhalang Dhar ula kular ban pynkiew kyrdan ïaka Upper Primary School sha ka Secondary School da kaba ïarap pisa haduh 10 lak tyngka ha kane ka taiew ban wan ban shna noh ïa ki Additional Class Room.
Na ka bynta ki jingdonkam ka shnong ula kular ïa baroh ki nongshong shnong ka Nongkroh baka jingkhang jong u ha Secretariat ka plie baroh 24 kynta ïa kiba donkam ban ïakynduh ïa u, da kaba ong haka por election kum u kyrtong u wan ban pynthut na ka bynta ban ïalap Election ban mynta ka dei ka kynti jong ki nongshong shnong ban wan pynthut ïala u jong u MLA.
Ha kane ka sngi la ïadonlang naduh u MDC ka thaiñ ma Jesse Suiam, Waheh Shnong ma Ekwin Rynjah, u Secretary Shnong ma Kyrmenlang Rynjah, ki nongïalam shnong, ki longkmie ki longkpa, ki khun samla nalor kiwei de.
Kiwei de kiba ai jingkren kila pynpaw ka jingsngewnguh ïa u MLA uba la ïarap ïaka shnong ha kiba bun ki liang, da kaba ong ba ka jingïoh jong ka shnong ïa kane ka Dorbar Hall kan ïarap shibun eh ïa ka shnong ban pynïaid ïa ki kam ki jam lyngba ki jingïalang paidbah.
La pynphuh shuh shuh ïa kane ka sngi da ki jingrwai bad ki jingshad na ki nongshong shnong ka Nongkroh, hashwa ban pynkut u ma Sniawbhalang Dhar ula plie pyrda ïa u mawnongrim bad ban ot ïa u Ribon jong kane ka ïing Dorbar. Kum ka dak jong ka jingburom ka shnong kala ai sngewbha da ka Mementos sha u MLA.