Ka East Jaiñtia Hills District Football Association (EJHDFA) mynta ka sngi 11 tarik u Naiwieng, 2024 kala sdang ïa ka lympung ïalehkai phutbol jong ka kyrdan Super Division Football Tournament-2024 kaba la tip kum ka 4th Kyrmen Shylla Contribution Trophy ïa kaba la pynïalehkai ha madan EJDSA Artificial Turf, Diengshynrum, Khliehriat.
Ïa kane ka lynpung Super Division la wan ban plie pyrda da u ma Grimlang Dkhar u rangbah naka thaiñ Elaka Narpuh kum u kongsan, haka jingdonlang u ma Streamly Nongjop Suchen u President KSU East Jaiñtia Unit kum u Symbud kongsan ki nongkitkam ka East Jaiñtia Hills District Football Association, ki Waheh Shnong jong ka District, ki riew paw khmat ka East Jaiñtia lem bad paidbah riewieit phutbol ka thaiñ.
Haba phai sha ka jingïakhun kaba nyngkong ka Sutnga SSCC kala jop da 1-0 kol ïa ka Chiehruphi SYWSC, ïa katei ka shikol na ka Sutnga SSCC lathep da u Raplangki Lyngdoh haka minit ba 48.
Katba ha ka jingïakhun kaba ar kaba la long hapdeng ka R.Iawpynsing SC pyrshah ïa ka Thangskai Tiger SC, kila poi sha ka jingïakhaid da 1-1 kol, ïa ka kol na ka R.Iawpynsing SC la thep da u Hesmiki Rymbai haka minit ba 5, kaba ïa ka kol na ka Thangskai Tiger SC la thep da u Pynthymme Rymbai haka minit ba 19.
La pyntip ka jingïakhun lashai ka sngi 12 tarik u Naiwieng kan long hapdeng ka R.Shkenshynriah SC pyrshah ïa ka Dhana SC haka por 11:45 am, katba ka Ladrymbai-B SC pyrshah ïaka Khliehriat West YWSC haka por 2:15 pm.
