Ia ka jingdap 51 snem jong ka jingioh jylla ba pura jong ka Jylla Meghalaya la rakhe ruh ha Khliehriat, East Jaintia Hills mynta ka sngi 21 tarik. Ia ka prokram la pynbit pynbiang da ka ophis jong u Deputy Commissioner, East Jaintia Hills District ha kaba la pynlong ia ka jingialang ha DC Conference Room.
U DC ka East Jaintia Hills District u Abhilash Baranwal, IAS ula long u kongsan, ha ka jingiadonlang u Abhinav Kumar Singh, IAS, DSO (Sadar), East Jaintia Hills District, Khliehriat, bah G. Warjri, MCS, Addl. Deputy Commissioner, East Jaintia Hills District, bah A. Nongbri, MCS, Addl. Deputy Commissioner, East Jaintia Hills District, kong D.D. Syngai, MCS, Addl. Deputy Commissioner, East Jaintia Hills District bad ki District Heads jong ki tnad sorkar bapher bapher.
Kum shi bynta jong ka jingrakhe la pynlong ia ka Meghalaya Day Run ba la pynlong da ka ophis District Sports Officer, East Jaintia Hills District ha ryngkat ka jingiatreilang bad ka District Administration. Ia kane ka jingmareh kaba jngai 7 Km la kaweh lama da u J. Shyll MCS, Addl. Deputy Commissioner, East Jaintia Hills District, Khliehriat kaba la sdang na ka ophis DC ba rim shaduh sha shnong Rymbai bad wan phai biang hajuh. La sam ruh ia ki prize sha ki nongjop shynrang bad kynthei. Ha ka liang ki shynrang la ioh rah ia ka 1st Prize da u Knerlang Phawa, 2nd Prize u Josmi Ryngkhlem, 3rd Prize u Kordor S. Manners.
Ha ka liang ki kynthei 1st Prize la ioh da ka rosy Sana, 2nd Prize ka Lamsuk Phawa bad ka 3rd Prize ka Mariwi Shylla.
