Mynta ka sngi ha East Jaintia ruh la rakhe ia ka World Water Day halor ka phang “Ground Water, Making the Invisible Visible”.
Ia kane ka prokram la pynlong da ka District Water & Sanitation Mission (DWSM), Jal Jeevan Mission (JJM), East Jaintia Hills ha St. Anthony’s College Extension Auditorium, Byndihati, East Jaintia Hills District. Ha kane ka sngi u ma Kyrmen Shylla myntri ka sorkar jylla ba dei peit ia ka tnad Social Welfare, Revenue and Disaster Management etc. ula long u kongsan bad u Deputy Commissioner ka East Jaintia Hills u Abilash Baranwan, IAS ula long u symbud kongsan.
U ma Kyrmen haba ai jingkren ula ban jur ia ka jingdonkam ban tip kumno ban kynshew ia ka um, namar ba ka long ka jingdonkam kaba kongsan tam ha ka jingim.
Ula iaroh ruh ia ka jingtreishitom bad ka jingshim khia jong ki nongtrei ka tnad PHE kiba la ialeh ban pyniaid shakhmat ia ki skhim pynioh umbam umdih hapoh kane ka District. Ula pynkynmaw ba ki skhim kiba dang pyntrei shait shait ki long ka Greater Rymbai WSS, ka Synrang Umlawe Combined WSS, ka Ummyrho Combined WSS. U la ong ruh ba ka sorkar ka la thaw ki lad ban pynioh um bam um dih sha baroh ki thliew ïing ha ki nongkyndong hapoh u snem 2022 lyngba ka Jal Jeevan Mission.
U DC ka District u Abhilash Baranwal ula kyntu ia baroh ki paid nongshong shnong ba kin shim ka jingkitkhlieh ban thung ia ki dieng khnang ba yn lah ban tyngkai ia ka um poh ramew, kaba dei kawei na ki lad ban pynioh um ia ki briew haba jia ka jingshah pynjot ne pynjulor ki ki um ki ha sla pyrthei.
Ha kane ka sngi la don ruh ka jingbatai shaphang ka jingpynkhuid ia ka um lane ka Filtration of Water bala ai jinghikai da u J.K. Singh, Estate Manager ka Star Cement Plant.
Kiwei de kiba ai jingkren ki kynthup ia u ma Paul Synnah EE. PHE, Electrical Division, Jowai cum Member Secretary, DWSM- JJM, East Jaintia Hills District, u ma R. Nongtdu SDO PHE Electrical Sub- Division, Rymbai, u ma M. Passah, SDO PHE, RWS Khliehriat Sub- Division bad ka kong Miio Dkhar kaba la mihkhmat na ka shnong Cham Cham.
Kham hashwa u ma Kyrmen Sylla ula plie ruh ia ka World Water Day Exhibition Competition na ka bynta ki khynnah skul jong ka District.
Ha kane ka sngi kala don ruh ka jingrwai tynrai, ka shad tynrai da ki nongtrei ka PHE kong Elisha Sympli. Kala don ruh ka jingsam ia ki khusnam sha ki nongjop bad ka jingai Certificate sha baroh ki skul kiba la iashim bynta ha kane ka prokram.
