Kum shi bynta ban rakhe ia ka sngi laitluid kaba 77 jong ka ri India, ka Joint Action Committee School Lumpyngngad (JACSL), Amlarem sub division ha ka 15.08.2023 ka la lehkmen ia ka ne ka sngi laitluid ka ri India kum ba leh Lang da ki wei pat ki jaka hapoh ka Ri, wat lada ki don sha ki thaiñ border Bangladesh, kham pajih na ka Sub-Division bad na District Headquarter ruh, hynrei ki nongialam shnong kim klet ban rakhe ia ka ne ka sngi khraw jong ka Ri, kum shi bynta ban pynsngewthuh paitbah ia ka jinglong nongshong shnong babha, ban wanrah jingsuk, jingkmen, jingiatylli bad ban pynrung ha ki jingmut jingpyrkhat ki nongshong shnong ban ieit ka Ri bad ka jait bynriew.
Ha kane ka sngi la ioh ruh ban pynher ia ka lama lai rong ka Ri India da u kongsan ba shah khot sngewbha u ma Salan Swer uba dei u Range Forest Officer, Pasadwar Range bad kumjuh ruh u la ai jingkren sha ki paitbah ha kaba iadei bad kane ka sngi.
La wan sakhi ia kane ka sngi da ka jingmih paitbah ki nongshong shnong ka Lumpyngngad, ki nongshah khot sngewbha, ki nonghikai, ki khynnah skul bad na ki shnong ba marjan.
La pynphuh pynphieng ia kane ka sngi da ka jing ia shim bynta ki 4 tylli ki skul ba don hapoh shnong, kita ki long ka Lumpyngngad UPS, Lumpyngngad Non Govt LPS, Lumpyngngad RCLPS, Lumpyngngad Presbyterian LPS bad kumjuh na ka VO Tur Shaphrang.
Ha kane ka sngi la ioh ruh ban sakhi ia ka match pass na ki khynnah skul, ki mass drill na ka skul LPLPS, LUPS, RCLPS bad ka jingshad group na ka VO Tur Shaphrang.La ai jingkren ruh da u waheh chnong/Advicer m C.Talang, na ka Miss Rihok Swer bad la kren ai khublei da ka Miss Liberty Rymbai. Kane ka dei ka khyrwoh ba la phah da u Chairman ma Johnny Shylla.
