Ka long kaei kaei ka khubor kaba pynkmen ïa ki paidbah ka dong ka thaiñ khamtam ïa ki briew kiba pang kiba shitom namar ha ka sien kaba nyngkong eh ki nongai dawai Khasi jong ka South West Khasi Hills District kiba don kumba 87 ngut eiei kynthup ïa ki nong ai dawai kiba don kumba 40 ngut, Nongkhem kiba bun kidei ki longkmie 20 ngut bad ki nongthung bad kiba ai dawai 40 ngut, ki la long tylli kawei bad ïa snohkti kti lang hapoh ka shatri jong ka Synjuk ki Nongsumar Dawai Khasi Nylla Association kum shibynta ban ai jingshakri ïa ki paidbah lyngba ka jingsumar da ki dawai khasi ïa ki briew kiba pang kiba shitom.
Kaba kham pynkmen bad kham pynsuk shuh shuh ïa ki nongpang ka long ba kine ki nongaidawai khasi, kin ai dawai lang ha kajuh ka jaka ha ka shnong Mawmerang, kaba mar jan bad ka Skul JNV kaba tip kum ka Traditional Clinic bad ha kane ka clinic yn ai dawai man la ka sngi bad kin don arngut ki nongaidawai bad arngut ki Nongkhem.
Na ka liang u bah Gopstan Marweiñ, President Nongsumar Dawai Khasi Nylla Association u la ïathuh ba ïa kane ka Association la dep ban register bad ka la ïoh ruh ïa ka jingithuh bad u la ïathuh ba la kyrshan bad bei pisa ïa kane ka clinic da ka sorkar jylla lyngba ka tnat Bio Resources Development Centre.
U la ïathuh ruh ba ka jingai dawai kan sdang noh naduh mynta wat la ym shym pat la plie pura ia ka, khnang ba ki paidbah nong wad dawai kin tip.
U la ïathuh ruh ba ha kane ka clinic yn sumar lut ïa baroh ki jingpang jingshitom kumjuh ruh ïa kiba pang Cancer, Ulcer, HIV bad kiwei kiwei.
Nalor kine ki don ruh ki Nongkhem bad ki nongsop dawai kiba tbit kiba sumar ïa ki longkmie ha ka por ba armet, pynkha khun bad kiba sop ïa kiba kheiñ shyieng mynsaw bad kiwei kiwei.
