Ki nongïalehkai shynrang bad kynthei jong ka West Jaiñtia Hills District kiba don 216 ngut lem bad Coaches & Managers mynta ka sngi Saitjaiñ kila mih ha ryngkat ki jingkyrkhu kyrdoh hashwa ba kin leit ïashim bynta sha ka 5th Meghalaya Games 2024 ka ban sdang naduh ka 15 tarik haduh ka 20 tarik u Kyllalyngkot, 2024 ha nongbah Tura, West Garo Hills District.
Ïa kane ka 5th Meghalaya Games 2024 la pynlong daka tnad Directorate of Sports & Youth Affairs, Meghalaya, Shillong ha ryngkat ka jingïatreilang bad ka Meghalaya State Olympic Association.
Hashwa ba kitei ki nongïalehkai jong ka West Jaiñtia Hills District kin mih kala don ka jingïalang mynta ka sngi haka por 4 shiteng janmiet ha Kiang Nangbah Indoor Stadium, Dongmihsngi Jowai, ha kaba la ïoh ka jingkren pdiang da u ma P. Lamare u Vice-President ka WJDSA bad uba dei ruh u Chef-De-Mission West Jaiñtia Team.
Na ka liang u Deputy Commissioner ka West Jaiñtia Hills District bah B.S. Sohliya (IAS) ula long kum u kongsan, haka jingdonlang ki nongkitkam ka WJDSA, ki kmie ki kpa jong ki khynnah ki ban leit ïashim bynta ha ki jingïalehkai bapher bapher nalor kiwei de kiba la shah shot khot sngewbha.
La ïoh ruh ka jingkren lyngkot na u kongsan jong kane ka sngi u bah Sohliya uba la ai ka jingkyntu kynpham bad ki jingkyrkhu kyrdoh ïa baroh kitei ki 216 ngut ki khynnah shynrang bad kynthei lem bad Coaches & Managers jong ka District ba kin don ka mynsiem jingïaleh da ka jingkyrmen skhem ban ïoh ïa ka jingjop.
Ula pynsngew ba ka West Jaiñtia Hills kaba la ju paw bha ha ki kam ïalehkai Sports bad ka dei ruh ka kynhun kaba la wan bha kham shakhmat ha kino kino ki jingïakhun hapoh ka jylla, kumta u don ka jingkyrmen skhem ba ka West Jaiñtia Hills kan long kaba nyngkong eh ha kane ka 5th Meghalaya Games 2024.
Shuh shuh ula ai mynsiem ïa ki khynnah ïalehkai ka District halor ka jingshimkhia jong ki ïa ka kam ïalehkai Sports namar kane kan ïarap shibun eh ïa ki ban lait na ki kam sniew bad khamtam na ki jingdih ba sniew kiba ha rukom.
La ïoh ruh ka jingduwai kyrkhu kyrdoh ïa baroh kitei ki khynnah ïalehkai jong ka District da u TBn. J.R. Shullai bad la ïoh ki kyntien ai khublei na u Homelin Bareh Asst. Chef-De-Mission West Jaiñtia Team.
