Ka Dorbar Shnong Tuber Kmaishnong East Jaiñtia Hills District mynta ka sngi 10 tarik u Kyllalyngkot 2024 kala pynlong ïa ka jingïamih paidbah bad ïaid Rally naduh ka por 8 baje mynstep na Madan Yurim (Khliehpynthor) haduh Laisieh Kynda Tuber Kmaishnong, shi bynta ban pynrem jur ïa ka jingleh runar u Training Phawa uba la nud ban pynmynsaw wat ïaki nongïalam jong ka shnong.
Ha kane ka jingïaid rally la ïashim bynta naduh ki longkmie ki longkpa bad ki khun samla ka shnong kiba la rah lang ïa ki lama ïong, ki pla card bad ki jingthoh ban pynrem, hashwa kane la don jingïalang ha Madan Yurim ha kaba la ïoh ki jingkren katto katne naki nongïalam shnong ba thymmai bad kiba rim kumjuh kiba la pynrem jur ïa katei ka kam sniew u Training Phawa kaba la jia haka miet jong ka 3 tarik u Kyllalyngkot, 2023.
Ha kane ka sngi kum ka dak ban pynrem ïa ka jingshah pynmynsaw ki nongïalam shnong ka Tuber Kmaishnong ba kynthup ïa u Micky Lyngdoh uba dei u Waheh Shnong ka Shnong Tuber Kmaishnong bad sa uwei u Denis Lyngdoh uba bat ïa ka kam Secretary IVCS udei ruh u Chairman ka Seinraij Tuber Kmaishnong uba kham mynsaw jur ha ki bynta jong ka khlieh.
Kumta ka shnong kala pynrem ïa kane ka jingleh riew khlaw jong u Training Phawa uba dei ruh u nongshong shnong jong katei hi ka shnong, haka juh ka por la pyntip ba u bat ïa ka kam Finance Secretary jong ka Seng Jaiñtia National Council (JNC), Central Body.
Ka Dorbar shnong kala shim ïa kane ka sien jam shi bynta ban khang lad ïa kum kine ki kam sniew kim dei shuh ban wan jia hapoh ka shnong ka thaw bad ha ka juh ka por ban ïada ïa ki khun samla ka shnong ba kim bit ban leh ïa kum kine ki kam sniew kiba lah ban ïalam bakla ïa ka shongsuk shong shngaiñ, la ong u Waheh Shnong ma Micky Lyngdoh.
U ma Micky Lyngdoh uba la mynsaw ha ki bynta ka kti haka jingkren sha ki lad pathai khubor ula pynsngew ïaka jingjia naduh kaba sdang ha kaba don kawei ka Scooty kaba wan pynher stet bha shapoh ka shnong na surok bah (NH) ha kaba ki don ki nongshong shnong kiba la jan shah lymbub naka jingpynher stet palat katei ka Scooty.
Hadien bala mih ka jingïa huri hura hapdeng ki ar ngut kiba shong ha ka Scooty bad ki nongshong shnong kala poi ka jingtip shaduh u Waheh Shnong kumta mar mar u Waheh Shnong ula leit mih sha katei ka jaka ba jia, ynda la poi ha katei ka jaka kala long kaba jai jia, hynrei kumba katto katne por kala mih biang ka jinghuri hura ha kaba utei u Training Phawa uba la wan kham hadien ula shim da u sdie ban pynmynsaw ïa kitei ki nongïalam shnong kiba thmu ban pynthynda ïa ka jinghuri hura hapoh ka shnong.
U Waheh Shnong hadien ka jingmynsaw ula pyntip mar mar sha ki pulit ka Thanad Ladrymbai, hynrei na ka daw ka jingduna ki pulit kim shym la wan ha katei ka miet, da kaba kular ba kin wan ha ka por mynstep.
Ula ong ka jingsei jong u Training Phawa ïa u sdie kala buh ka jingshong syier ïa ka jinglong jingman jong ka shnong kaba la wanrah ruh ïa ka jingsngewsih ïa ka ïing ka seng, ka kur ka jait bad ïaka shnong ka thaw hi baroh kawei, ong u ma Micky Lyngdoh uba shah pynmynsaw.
Kum ka shnong kala pynrem jur ïa u Training Phawa uba la leh ïa kane ka kam, haka juh ka por ula kyntu ba ka seng JNC kin shim khia ïa kane ka kam katkum ki kyndon aiñ jong ka seng jong ki.
Shuh shuh u Waheh Shnong ula pyntip hadien ka jingmynsaw jong u ha ki bynta ka kti bad ula leit ban phah sumar ka Woodland saw mer bad hadien ula leit sha Shillong. Katba ïa u Denis Lyngdoh uba la mynsaw jur la pynkit mar mar ïa u sha Jowai Civil Hospital Ialong namar ka jingshitom jur ha ki bynta ka khlieh hynrei donbok ba um shem la shah ktah eiei hadien bala dep sumar ïa u da ki Doctor bad mynta ula don ha ïing saj hapeng ka jingtlot ka met.
La pyntip da u ma Micky Lyngdoh ïa ka jingujor FIR la dep ban leit ujor ha ka step 4 tarik ha thanad Ladrymbai da u para jong u, na ka liang ki pulit kila pynkloi ïa kane ka kam da kaba register case bad kaba la poi shaduh ka ïing bishar ba donburom ha Khliehriat, halor kane na ka liang u Training ula dep ban leit ai statement hynnin hi ka sngi, la ong u Waheh Shnong.
