Moolamylliang: Ka Village Education Committee (VEC) ryngkat ka Dorbar Shnong Moolamylliang ka la pynlong ia ka jingpynkupburom ia ki khynnah pule ha ka 4.9.21 ha Moolamylliang U P School kiba la leh bha ha kane ka Examination SSLC/HSSLC kaba dang shu dep shen ha kaba u Dr Sankey Shangpung, Chairman jong ka JHADC u la long u Kongsan. La pyniaid ia kane jingialang da u Ngeitskhem Syrti u ba long u Chairman jong ka VEC, la ioh ia ka jingkrenpdiang na u Knerlang Pala u ba long u Secretary jong ka VEC, la ioh ia ka jingkren lamphrang na u Damewanhi L Rymbai, Asst Waheh Shnong ha kaba u la pynsngew ba kum ba long mynta ka shnong Moolamylliang kam pat don tang iwei i Secondary School kumta ka Village Education Committee ryngkat ka Dorbar Shnong Moolamylliang da kawei ka jingmut ka la rai ban pyrshang ban wad ia ki lad ki lynti bad pynioh ia kane ka jingdonkam bad jingangnud jong ki nongshong shnong bad ban pynbha pynmiat ia ki skul kiba don hapoh shnong.
La ioh ia ka jingkren kitbok kitrwiang bad kyrkhu kyrdoh na u Apmon Pachiang, Waheh Shnong u la kyntu ia kine ki khynnah pule ban wad ia ka jingnang jingstad wat lada ki hap ban mad ia ki dieng pyngkiang bad maw jynthut ha ka jingiaid lynti jong ki ruh ba kim dei ban sngewthait sngewlwait dei ban duriap khop haduh ban da ioh kheit ia u soh jong ka jingjop.
Na ka liang jong u Kongsan Dr Sankey Shangpung u la ai ia ki kyntein sneng kyntein kraw bad sam ia ki jingai sah jingkynmaw bad ka syrnod pynshlur sha 21 ngut ki khynnah pule jong ka shnong ha kaba u la ong ba ka jingpass ia ka SSLC/HSSLC kam pat biang namar dang dei tang ki mawjam banyngkong ba ar dang bun ki mawjam ban kiew te ka jingsngewsarong sngewmeng ka ju pyllong ia ki ban pep na ki jingpule bad u la kyntu ruh ban kiar na ki jingsniew jong ka pyrthei khamtam na ka shongkha khynnah bad u da ban jurbha ia ki khynnah pule ban ki dei ban long kiba don ka jingkit khlieh ban pyndep hok ia ka kamram jong ki bad ban long ki ba don akor bad kiba minot kiba duriap.
Khatduh u buh ia kine ki kyntein ai mynsiem bang idei ban ong ha lade “Ba lada kiwei ki lah balei ngam lah” khnang ban poi sha ka kliar jong ka nam .
Ha dein ka jingpynkupburom la ioh ban pyllait ruh ia ka kot iarap na ka bynta ki khynnah ki ba dang pynkhreh ia ka SSLC Examinaton MBOSE ki ban sa wan kaba la thoh da u Kamphereiei Pala. Ha shwa ban pyllait paitbah u Nongthoh u la kren shaphang ka jinglap jong u ha ka ba la pynlong ia u ban thoh bad pymih ia ka kot ka ba u la ai kyrteng ka “Curious Brain, Chapter wise Question Bank” ha kaba u la ong ba ka jingduna ka buit ha ka rukom ban pyrkhreh ia ki exam bapher bapher ka ktah haduh katta katta ia ka jinglah jong ki khynnah. U la ong ba ha ki por ba u dang pynkhreh ia ka SSLC, HSSLC bad kum juh ia ka NEET, u lap ba don ar tylli ki rukom ban pynkhreh ia kine ki jait exam ia kiba ula batai shai ha kane ka kot jong u.
Kumta u la kyntu ia ki khynnah ki ba dang pynkhreh ia ka Exam SSLC MBOSE ba kin sngewbha ban pyrshang ia kane ka kot kumba ki wei ki Board bad ki jait bynriew ki pyndonkam ha kane ka juk bad kan ai ka jingiarap ia ki. Ia kane ka kot lah ban ioh na u Nongthoh, na ki dukan die kot ba paw ha ka jylla bad lah ban order online ruh na ka Amazon bad Flipkart ha ka dor Rs 295/- kawei bad ia kane ka kot la pyllait paitbah da u Dr. Sankey Shangpung, Chairman, JHADC u ba long u kongsan bad la aiti ruh ia ka jingai sahjingkynmaw sha u Nongthoh da ka Village Education Committee ryngkat Dorbar Shnong Moolamylliang lyngba u Kongsan kum ka dak ban ai mynsiem ia ka jingtreishitom jong u ne u Samla. La ioh ia ka jingkren ai khublei da ka kong Ngeitmon Dkhar ka ba long ka Nonghikai jong ka Moolamylliang U P School.
Ha dein ba la wai ka jingialang la don ka jingthung dieng da u Kongsan Dr. Sankey Shangpung, Chairman, JHADC.
