Ki nongialam jong ka ACHIK (Achik Conscious Holistically Intergrated KRIMA) hynne ka sngi ka 2 tarik Jylliew ki la leit iakynduh ia u Lat ka Jylla u CH Vijayashankar ban pynsngew halor ka jingdawa ban wanrah ia ka nongbah tlang ha Tura.
Haba kren sha ki lad pathai khubor u Adam R Sangma Secretary ka kynhun Achik u la ong na ka liang ka kynhun ka la ioh ban pynsngew ha u Lat ia ki mat haba iadei bad ka Garo Hills kaba kynthup naduh ka roi ka par, ka pule puthi, ka jingiada na ka jingwan rung kyrthep ki briew nabar bad kumjuh ban pynneh pynsah ia ka riti dustur jong ki paid Garo.
Shuh shuh u la ong ka mat ka kongsan ka dei halor ka jingdawa ban wanrah ia ka nongbah tlang ha Tura.
Na ka liang u lat ka jylla u la pynsngew sha ka kynhun ACHIKS ba un bishar bniah ia ki mat halor ka jingdawa jong ki na ka bynta ki nongshong shnong ka Garo Hills.
