Ki Khubor kiba la iohlum na baroh ki khatkhyndai Constituency MDC jong ka JHADC ha West Jaintia Hills District, la ong ba ka jingiathep vote ban jied ia ki Nongmihkhmat sha ka Iingdorbar jong ka Jaintia Hills Autonomous District Council (JHADC) kaba la long mynta ka sngi (21/02/2025) ka long kaba iaid beit iaidryntih khlem kano kano ka huri ka hura.
Kane ka jingiaidbeit iaidryntih ka jingiathep vote, ka jingiaroh ka leit sha ki paidbah Nongthep vote jong ka West Jaintia Hills, ki riewshai, ki riewbat Aiñ bad ki bym don kano kano ka jingshah pynbor dano re dano lane ka jingshah shiliang ha ka ban jied ia u ne ka Nongmihkhmat sha ka iingdorbar jong ka JHADC bad ka shong ha ka mon ba laitluid jong uwei pa kawei ba kin jied kat ia uba ne kaba ki sngewmon.
Ka jingiajied ia U ne Ka Nongmihkhmat sha ka Jaintia Hills Autonomous District Council ha kane ka kynti kat kumba paw bad na ka jingiakren ki briew harum haneng kim da thew eh ia ka Party hynrei ki peit ia u briew ne ka briew kiba kum kino kiba long ki rangkynih bad ki rangphawar ki ban kren hapoh Iingdorbar, ban shna ki Aiñ ki Kanun kiba iada ia ka jaitbynriew ban pynkhlaiñ ia ka 6th Schedule.
Ha ka jingleit jurip la lap ba ki nongthep vote ha man la ki Polling Station ki iamih bad shimkhia ban pyndep ia la ka hok jied nongmihkhmat.
Ha ki thaiñ khappud jong ka Meghalaya bad Assam wat hapdeng ka jingmaham jong ka Karbi Students’ Association hynrei ka jingiathep vote ka long kaba iaid beit iaid ryntih iathuh ka tyllong khubor ba thikna.
