U District Magistrate (DM) jong ka West Jaintia Hills District u Abhinav Kumar Singh, IAS, mynta ka sngi ula pynmih ia ka hukum ba la pynjari da ka pakhang miet (Night curfew) ha baroh shilynter ki bynta khappud jong ka District bad ka ri Bangladesh.
Ia kane ka jingpynjari curfew miet la hap ban leh na ka daw jong ka jingbymshngaiñ ka long ka man ne ka shongsuk shongsaiñ hapoh ka ri Bangladesh.
Katkum kane ka hukum la khang ia ka leit ka wan kaba jngai 200 metres, na u zero line (International Border), naduh ka por 8:00 PM haduh 6:00 AM.
La khang ruh ia ka jingialum briew kaba palat ia ka 5 ngut, lane ban rah ia ki tiar pynmynsaw. La khang ruh ia ka jingkhaï beaiñ ha baroh shilynter ki bynta khappud ka District bad ka ri Bangladesh.
Kane ka hukum kan treikam noh naduh mynta ka sngi 26/11/2025, tad haduh ban da pynmih da kawei pat.
