U Bah Alexander Laloo Hek uba dei ruh u MLA jong ka Pynthormkhrah Constituency (BJP) hynne ka sngi ka 11 Tarik Nailur u la ong ba ka seng BJP ka la pynpyntikna ba kan iakhun ia ka elekshon shiteng samoi ha ka constituency Gambegre.
Kum ban shu pynkynmaw, ka shuki MLA ha Gambegre ka la thylli mynta hadien ba u Saleng Sangma u la hiar noh na katei ka kam na ka jingjop ia ka elekshon MP na Tura.
Katkum ka jingbuhbeit jong ka Election Commission, ka elekshon ha katei ka constituency kan long ha u bnai Risaw mynta u snem.
Na ka liang u nongialam ka BJP, u la ithuh ba ka seng ka la dep ban pynlong ia ka jingialang dang shen ha Tura bad u la pynshai ba ia u kyrtong yn sa pyntikna bad uta u nongiakhun udei beit u nongjop, la ong u Bah Hek.
“Ngin jied da uba biang bad haba ngi ïakhun, ngin iakhun ban jop” la pynshai u Bah Hek. Shuh shuh u la iathuh ba ki paidbah ki la ai jingmut ruh ba ka seng kadei beit ban ïakhun ia kane ka elekshon bad na ka liang jong u ruh u la ai mynsiem ba ka BJP kan ïakhun khlem da artatien bad kin jied da u kyrtong uba don kabu bha ban jop.