Ki Nonghikai jong ka Federation of All School teacher of Meghalaya (FASTOM) mynta ka sngi ka 2 tarik Risaw 2025 ki la rai ban pynsangeh noh ia ka jingiakhih hadien ba ka sorkar ka la khot iakren ia ki nongialam jong ka FASTOM.
Haba kren sha ki lad pathai khubor na ka liang u Vice President u Bah Sanbor Jungai u la iathuh ba ki nonghikai ki la rai ban sangeh noh ia ka jingiakhih hadien ba ka sorkar ka la rai ban pynthymmai noh ia ka jingsiew jong ki nonghikai Adhoc ban kynthup ia ka jingsiew ba thymmai kata ka Basic Pay, ka Dearnest Allowance, ka Central Provident Fund bad ka Death Cum Retirement Gratitude (DCRG) bad ia kine ki jingpyntreikam ka sorkar ka la pan por 3 bnai ban pynbeit ia kine baroh ki jingdawa jong ki nonghikai FASTOM.
Nalor kata u Vice President u la ong ba ia ka tulop kaba thymmai dei ban pyntreikam naduh ka 1 tarik ïaiong jong u snem thymmai bad ka jingsiew ia ki nonghikai adhoc kan kynthup naduh ki Pre – Primary, Primary, Higher Secondary, ki nonghikai Science bad Hindi, kynthup ia ki skul Adhoc kata ki skul miet bad skul step.
Shuh shuh u la ong haba iadei bad ka DA , kin ioh ha 1 sien shi snem, haba iadei bad ka CPF ka Sorkar ka la rai ban ai 8 percent bad na ka liang ki nonghikai ki la mynjur ban synniang 8 percent sha ki account CPF, khatduh haba iadei bad ka DCRG ki nonghikai ki la iakren bad ka sorkar bad kin sa shong jingialang bad ka tnad pule puthi haba iadei bad ka jingsynniang na ka bynta ka DCRG.
Khatduh u Vice President u la pyntip watla ka jingdawa kam dei haduh 100 percent hynrei 70 Percent ki jingdawa ki la urlong bad na ka liang ka sorkar ka la rai bad kohnguh ia ki nongialam jong ka Federation of All School Teacher of Meghalaya.
