Hadien ka jingjied ia ki nongkitkam ba thymmai mynta ka sngi ka 5 tarik Naitung, ka Shillong Press Club ka la ioh ban pynthymmai biang ia ki dkhot lyngba ka jingiathep vote ba la pyniaid da ka ophis DIPR, Shillong.
Ha kane ka jingiakhun, ia ka shuki President la jop da u Bah D.L. Siangshai da 91 vote, ia ka shuki Treasurer la jop da u Bah Gershome Hat da 113 vote katba ia ka shuki General Secretary la ioh ban bat da u Bah Dominic Savio Diengdoh khlem don nongiakhun pyrshah.
Kum ban shu pynkynmaw, ka Shillong Press Club ka la iaid lynti mynta 31 snem bad ha ka 2 tarik Rymphang 2023 kane ka kynhun ka la ioh ia ka ophis treikam ba pura ha ka jingwan plie jong u Myntri Rangbah ka jylla u Conrad K. Sangma hapoh DIPR.
Ha 30 tylli ki snem, ka SPC ka la shu pyndonkam ia kawei ka ïing wai kaba don ha Lower Lachumiere hynrei lyngba ka jingiaineh ha ka jingtreikam kaba hok, ka SPC ka la ioh ia ka shlem treikam kaba thymmai ha DIPR complex.
