Ka Nephington Laloo Memorial Secondary School kaba long ka wei na ka shlem ai jinghikai ïa ka jingnang jingstad jong ki khynnah skul ka thaiñ kaba don ha ka Dong Mainroad Wahiajer, West Jaiñtia Hills District, mynta ka sngi 10 tarik u Jymmang, 2024 kala ïoh ïa ka jingkyntiew kyrdan na ka Secondary sha ka Higher Secondary School, Wahiajer, ïa kaba yn tip noh ïa ka kum ka Nephington Laloo Memorial Higher Secondary School, Wahiajer.
Ha kane ka sngi la wan ban ot ïa u ribbon jong ka kyrdan Higher Secondary School da ka kongsan jong kaba dei ka District School Education Officer, West Jaiñtia Hills District ka kong A.P. Syiem, ha ka jingïalang ba la pynïaid da u ma W. Lyngdoh, ha ka jingdonlang u ma S. Laloo, Secretary SMC ma H. Dkhar, ma L. Shylla Assistant Headman Wahiajer, ki nonghikai, ki khynnah skul bad ki longkmie longkpa.
Ïa kane ka skul la seng nongrim ha u snem 1987 tang ha ka kyrdan Lower Primary School, dei ha ka snem 1996 la kyntiew kyrdan sha ka Upper Primary School, katba ha u snem 2006 kala kiew kyrdan sha ka Secondary School bad mynta u snem 2024 ka la kot sha ka kyrdan Higher Secondary School.
Kumba long mynta ki nonghikai jong kane ka skul naduh klas Nursery haduh klas Ten, kynthup naduh ka Headmaster, ki nonghikai lem bad kiba yn sa thung (appointed) ki don 21 ngut baroh, katba ki khynnah skul ki don 102 ki shynrang bad 133 ki kynthei baroh ki long 235 ngut. Ka skul ka la ju wan bha shakhmat ha ka Exam SSLC bala pynlong da ka MBOSE.
Ka skul kala ïoh jingïarap ruh ha ka liang ka jingsiew tulop ïa ki nonghikai naduh ka LP School Under Deficit (Non Govt. L.P) kawei ka Pre- Primary bad kawei ka Regular Teacher, ïa ki Upper Primary Section la pynhap hapoh ka Adhoc Grand In Aid bad ka Secondary Level ki la ïoh kawei ka post Science Teacher (Maths) na ka sorkar, katba kiwei ki nonghikai la siew tulop beit na ka Management jong ka Skul.
Shuh shuh la pynsngew ba ka jingplie ïa kane ka kyrdan Higher Secondary School kan long ka jingsynñiang kaba khraw eh ïa katei ka thaiñ haka shnong Wahiajer bad kumjuh ïa ki shnong ba marjan namar dei tang kane ka skul kaba la ïoh ïa ka kyrdan Higher Secondary School ha kaba ki khynnah skul kim donkam shuh ban leit pule shabar na la shnong.
Na ka liang ka A.P. Syiem haka jingkren kum ka kongsan kala ai ka jingïaroh ïa ki bor pynïaid jong ka skul kiba la trei shitom ban wad ki lad ki lynti ban kyntiew kyrdan kham shalor ïa ka skul, kumta ka kyntu ïa ki bor pynïaid ka skul ba kin ïaid katkum kane ka juk jong ka rukom ai jingnang jingstad hapoh ka Ri katkum ki kyndon ka NEP.
Kala kyntu ïa ki khynnah skul ba kin treishitom ban don ïa ka thong haka jingim khnang ba kin long ki lawei ba phyrnai jong ka Ri. Ki nonghikai ruh ki dei ban long kiba stad ha ka rukom ai jinghikai ïa ki khynnah skul la ban shuh shuh ka kong Syiem.
Ka kong Syiem ka la ïathuh ruh ka tnad pule puthi hapoh ka District kan ïaleh katba lah ban ai jinghikai ïa kaba bha tam ïa ki khynnah skul da kaba kyntu jur ïa ki nonghikai ban don ïa kine ki lai tylli ki bynta kata ka jingstad, ka jingshemphang bad ka jingsngewthuh khnang ba un lah ban saiñ dur ïa ka lawei ki khynnah skul.
La pynphuh pynphieng shuh shuh ïa kane ka sngi da ki jingrwai na ki khynnah jong kane ka skul. Ïa ki kyntien ai khublei la ïoh na u ma D. Talang Secretary Dong Mainroad Wahiajer.
