Ki nongpyniaid jong ka All India Football Federation (AIFF) hapoh ka jingialam jong u President Kalyan Chaubey, ki la shim ia ka jingrai ha ka sngi saitjain, ka 20 tarik Naitung ban jied ia u Manolo Marques kum u coach ïalehkai phutbol ba pura ka India naduh mynta u bnai (Naitung).Hadien ba la ioh ia katei ka jingtyrwa, u Manolo u khlem artien bad kloi kloi u la pdiang ia katei ka jingtyrwa kaba heh “Ka long ka burom kaba khraw ban coach ia ka kynhun ïalehkai phutbol jong ka India, ka ri kaba nga ñiew kum ka ïing kaba ar. Nga kwah ban leh ia kaba bha tam ban wanrah ia ka jingkmen na bynta ki paidbah nongkyrshan kiba bun. Nga sngewnguh na ka bynta ka AIFF kaba la ai ia kane ka kabu bad nga ngeit ba ngin leh ia kiei kiei kiba bha ha ka phutbol” ong u Marques.Na ka liang u President u la ong “Ngi sngewkmen shibun ban pdiang sngewbha ia u Marques na ka bynta kane ka kam bad ngi sngewnguh ruh ia ka FC Goa kaba la pyllait kylluid mynsiem na ka bynta ban pyniaid ia ka kynhun jong ka ri”.Hadien ba pulom noh ka jingangnud ban ioh rung (qualify) sha ka FIFA World Cup ka ban sa long ha u snem 2026 ha ka jingialam jong u coach barim, kata u Igor Stimac, ka dkhot ka AIFF ki la sngewdei ban pynthymmai noh ia u nongialam na ka bynta ka jingkylla ha ka rukom ïalehkai mynta ka aïom. Ym lan ban len ba u Stimac u dei uwei na ki coach ba tbit tam ka India ha kaba u la lah ban pynioh haduh 3 tylli ki trophi ha kane ka samoi ba lah dep hynrei na ka jingmynjur lang jong ki dkhot ka AIFF bad ki nongialehkai la weng noh ia u Stimac khlem pat dei por.U Marques u dei uba la kha bad la heh la san ha Barcelona, Spain bad u la sdang ia ka jingiaid lynti kum u coach ha u snem 2002 na ka klob PB Anguera. Hadien bun bun tylli ki snem bad bun tylli ki klob, u la jied ban wan coach ha India ha u snem 2020 na ka klob Hyderabad.