U Chief Minister ka jylla Meghalaya u Conrad K. Sangma ula ong ba ka sorkar Meghalaya ka don jingkyrmen bad thikna ba hadien 3 snem bala pyntrei ia ka mission pynmih sying ne ka ‘Ginger Mission’ ka jylla kan sa wan ha ka kyrdan kaba nyngkong ha ka jingpynmih ia u Sying hapoh ka ri India.
Ia kane u Conrad Sangma ula kren ha ka jingplie ia katei ka ‘Ginger Mission’ ha nongbah Shillong mynta ka sngi.
Ka jngpyntreikam ia kane ka thong jong ka sorkar ka long ban pynkiew shuh shuh ia ka jingpynmih ia u sying hapoh ka jylla la kumno kumno haduh 1.5 lak MT ha ka shisnem ha kine ki 3 snem ban wan. Kumba long mynta ka jylla Meghalaya kala lah ban pynmih sying kumba 60,000 MT ha ka shisnem.
Lyngba kane ka mission ka tnad Agriculture bad ka Farmer’s Welfare kin iarap ban pynioh da ki jait symbai kiba bha kum u IISR Mahima, IISR Varada bad u Nadia kiba la pyndonkam bha ban thung mynta hapoh ka jylla.
Kumba 50,000 ngut ki nongrep kin sa ioh jingmyntoi bad ki jaka ban thung yn sa pynheh na ka 10,000 hactare sha ka 12,500 hactare.
Lyngba katei ka mission ka sorkar kan sa ai jinghikai ia ki nongrep ha ki rukum bapher bapher kum ka Package of Practices (POP) bad ia ka rukum rep kaba thymmai katkum ka juk stad ba mynta nalor kiwe de ki bynta kiba iadei bad jingpyniaid iew ia u Sying.