Ka Klob Shillong Lajong FC ka la ioh ban khur ia 3 poiñ hynne ka janmiet lyngba ka jingjop kput pyrshah ia ka Punjab FC ha ka jingialehkai ba la pynlong ha madan SSA stadium Polo Shillong.
Kane ka jingjop da 8-0 ka la ai mynsiem nyngkong ia ki rangialehkai ka Lajong kiba khlem pat ïoh ia ka jingjop ha ka jingiakhun na ka bynta ka lympung I-League 2024-25 bad kumjuh ka jingkmen ia ki nongkyrshan ka Lajong kiba la kyrshan radbah naduh ba sdang kane ka lympung mynta ka samoi.
Lah ban ong ruh ba kane ka jingjop mynta ka sngi kadei ruh ka jingjop ka ban sah kynmaw na ka bynta ka Lajong ha ka history jong kane ka lympung kaba heh.
Naduh ba sdang ka kylla step, ka Lajong ka la shim kabu bad khlem da pynsep-ei ia ki Minit ialehkai, ki la ioh ban pynkhih jar nyngkong lyngba u Figo Syndai ha ka minit ba 3, 2 kol la ioh lyngba u D. Tardin kata ha ka minit ba 17 bad 51, shi kol na u rangialehkai ka Brazil, u D. Gonçalves ha ka minit ba 45+3, shi kol na u I. Arana Sádaba ha ka minit ba 66, 1 kol na u H. Nongbri ha ka minit ba 87 bad ar kol lyngba ka jingbakla thep hi (own goal) ki rangialehkai ka Punjab, kata lyngba u M.Raina ha ka minit ba 53 bad shi kol na u rangialehkai Khasi uba ialehkai na ka bynta ka Punjab, u L. S. Khongsai ha ka minit ba 61.
Lyngba kane ka jingjop ka Lajong ka la ioh ban kiew ha ka kyrdan ba 8 da ka jingioh 5 poiñ katba ka Punjab ka dang neh ha ka kyrdan ba 11 da ka jingioh 3 poiñ.
Ka Lajong kan bteng biang ia ka jingiakhun ha la ïing ha ka 14 tarik mynta u bnai pyrshah ia ka Gokulam Kerala ha por 4:30 janmiet.
