Ki riew tymmen jong ka ri Lum Garo kila pynpaw hakhmat jong u Myntri Rangbah ka jylla u Congrad K. Sangma hynnin ka sngi ba ka jingshlei um bad ka jingshah pynjulor jong kane ka thaiñ kala wan jia biang hadien 50 snem tam.
Ha ka jingiakren bad u MR ki riew tymmen jong kane ka thaiñ kila iathuh ba kum kane ka jingjia kala ju jia mynshwa ha u snem 1964 kata 58 snem mynshwa. Ki pynpaw ba ka jingpynjulor ka iasyriem bha ha ki bynta jong ka Siju hynrei kaba mynta u snem ka kham jur haba nujor bad kito ki por.
Kila iathuh ba ki bynta jong ka wah Simsang kaba don hajan ka krem pubon jong ka Siju kala kiew haduh 30 phut palat ia kaba ju long manla ka por Lyiur jong ka snem.
Ka jingkieng shusdien (Rewak) kaba dei kawei na ki jingkieng kaba jrong tam hapoh ka jylla kaba pyniasoh ia shibun ki shnong sha shiliang jong ka wah Simsang kala shah pynjulor khait. La iathuh ba kane ka jingkieng ka don ha ka jingkynjang kaba 50 phut na sla um, pynban ka jingheh jong ka um kala lah ban pynjulor ia ka.
Na ka liang jong u MR ula pynpaw ba u kwah dalade hi ban leit jngoh ia ki bynta kiba la shah pynjulor ha ki bor mariang khnang ba un lah ban iohi da la ki jong ki khmat haduh katno ka jingshahktah jong kito ki thaiñ.
U Conrad ula ai ka jingbthah ia ki tnad sorkar bapher bapher sha ki thaiñ South Garo ba kin shim khia ban wanrah ia ki lad jingiarap ha baroh ki liang ia ki nongshong shnong jong ka thaiñ.
Hynnin ka sngi kala don ka jingai jingiarap da ki marbam kaba 2100 kg ia ki nongshong shnong da kaba pynpoi lyngba ki Helicopter jong ka Indian Air Force.
