‘Kular ka NHAI ban sdang maramot naduh lashai ka sngi‘
Ki nongïalam bad ki dkhot ka seng Khasi Sudent Union (KSU) Narpuh Circle ryngkat ki Waheh Shnong Narpuh Elaka, naduh ka shnong Mynkre ter ter haduh Malidor jong ka East Jaiñtia Hills District, mynta ka sngi jong ka 8 tarik, ki la sdang ka jingïakhih pyrshah ïa ka NHAI bad ïa ki bor District EJHD da kaba pynsangeh treikam ïa ka Toll Gate ne ka jaka lum khajna jong ka National Highway Authority of India (NHAI) kaba don ha Lumshong East Jaiñtia Hills District.
Mynta ka sngi la pynsangeh trei kam ïa kane ka Toll Gate naduh ka por 7 baje mynstep bad khang ïa ka jingïaid ki kali motor naduh ka por 10 baje tad haduh ban da dap 4 baje janmiet, kaba shimpor haduh 6 kynta.
Kine ki ar kynhun kila pynlong ïa kane ka jingkhang ïaid ki kali hadien ba la dep ban ai por ïa ki bor jong kane ka District kumjuh ruh sha ka NHAI ban maramot noh ïa une u surok NH-6 uba ïaid lyngba kane ka District uba pyniasoh shibun tylli ki shnong jong kane ka District kumjuh ki jylla bapher bapher jong ka thaiñ shatei lam mihngi jong ka ri.
Hynrei kumba long mynta une u surok ula buh jingma pynban ban ïaid lyngba na ka daw jong ka jingsniew bad jot palat uba lah ban wanrah ki jingjia ba sngewsih bad pynsohsat ïa ki nongleit nongwan.
Ki ar kynhun ryngkat bad ki paidbah nongshong shnong kila khang syndon mynta ka sngi haduh 6 kynta ïa ka leit ka wan lyngba une u surok da kaba lum paidbah ha katei ka Toll Gate kaba don ha Lumshnong.
Ha kane ka jingpakhang ïa une u surok bah la shah ban ïaid lyngba tang ïa ki kali kit nongpang bad ki kali shipai bad pulit.
Hapdeng kane ka jingpakhang surok ladon ruh ki pulit bad na ka liang ka ophis u DC EJHD la wan mih ruh u Additional DC bah G. Warjri ha ka jingsynran u DSP B. Batacharrji ban leit ïa kren bad ki ar kynhun hynrei ka jingïakren kamdon jinmyntoi ei ei, ha kaba ka jingpakhang surok ka la ïaid beit haduh ba kut ka por bala buh kata haduh 4 baje janmiet.
Hashwa ban kut ka por na ka liang u President ka KSU Narpuh Circle u bah K.S. Suchiang u la ong ba na ka liang ka seng bad ki Waheh Shnong ryngkat ki paidbah ki la pynsangeh treikam ne khrong khajna kat ym pat pynshna ïa ki bynta jong u surok haduh kumba 60 haduh 70 percent tang ban shngain shwa ka jingïaid ki kali.
Na ka liang ka NHAI la wan mih khmat da u Manager Technical jong ka u Biswa Jyoti Lahkar, u ba la kular ïa ka KSU kumjuh ruh ïa ki nongialam shnong ba kin sdang ïa ka jingmaramot ïa kane ka surok naduh lashai.
Shuh shuh ka seng bad ki paidbah hi ka thaiñ ki la ong ba lada ka sorkar bad ki bor District kim lah ban leh ei ei hapoh kane ka taïew kat kum ka jingpan por ka jong ki, na ka liang ka seng bad ki nongïalam shong kin sa shim ïa ka rai da kiwei pat ïa ki jingïakhih ba kham tyngeh.
