6 snem tam mynshwa ka sorkar ka la pynmih ia ka hukum ban khang ia ka surok ban iaid kali lyngba ka thaiñ Anjali-Mawlonghat ter ter kaba iaid lyngba ka jaka Punjabi Lane bad kaba mih ha Bimola Pharmacy (hajan Meghalaya Rural Bank, Iewduh branch).
Hadien ka jingkhim ka lynti iaid, ka Kong Rosetta Mary Kurbah, Deputy Commissioner East Khasi Hills District ka la pynmih ia ka jingpynbna hynne ka sngi ka 30 Tarik Risaw ba la shah ban iaid kali lyngba ia katei ka surok naduh 4 tarik Naiwieng 2024.
Ia kane ka surok yn shah ban iaid ‘One Way’ kata, ia ki kali kiba thmu ban kiew na Bimola sha Anjali la khang pyrshah. Ia ki jaka ieng kali (parking) na ka bynta ki bus la buh ha MUDA parking lot, hajan Anjali. Ka por na ka bynta ban ioh iaid lyngba katei ka surok ka dei naduh 8 baje mynstep haduh 4 baje janmiet.
Kum ban shu pynkynmaw, ka daw ba la khang ia katei ka surok naduh u snem 2018 kadei na ka jingmih huri hura hapdeng ki nongñiah bus STPS bad ki briew kiba sah ha ki thaiñ Them ïewmawlong bad Punjabi Lane.