Hadien ka jingialang ka High Power Committee (HPC) ha Secretariat ba la pynlong hapoh ka jingialam u Symbud Myntri Rangbah, u ba dei peit ruh ia ka Tnad PWD u Bah Prestone Tynsong, u Consultant ka IIT Guwahati, u Chief Secretary, ka DGP ki Deputy commissioner, ki ophisar ka Tnad PWD bad ka Tnad ka MeECL la rai pyllait biang ia ki kali ban iaid baroh arliang ka jingkieng dam site naduh lashai ka sngi, kata ka 30 tarik Naitung 2024.
Ha ka jingïoh iakren bad u Myntri ka Tnad bording u AT Mondal u la ong ba hadien ba la ioh ka jingmynjur na u Consultant ka IIT Guwahati, la mynjur ban pynlait noh ia ka jingiaid kali hynrei kane kan long tang ia ki kali rit ki ba khia ym palat ia ka 4 MT, bad yn ym pat shah ban iaid ia ki kali heh.
U Myntri u la iathuh ruh ba haduh mynta ka sorkar ka la dep ban pynlut 19.9 klur ban maramot ia ka jingkieng bad ban pynskhem ia ka dam, bad ban pynthikna ba ki kali heh kin ym ioh ban iaid na kane ka jingkieng ka Sorkar kan sa buh da ki Jingker.
U Mondal ula pyntip ruh ba ka Sorkar kala pynkhamti ha ka National Highways and Infrastructure Development Corporation Limited (NHIDCL) ba kan dang wad ia kiwei pat ki surok ban lah ban pyniaid ia ki kali heh khnang ba kane ka jingkieng kan shong skhem.