Ka Myntri ka tnad pla tyngka ka Nirmala Sitharaman mynta ka sngi ka 11 tarik Naitung ka la leit sha Lariti Mawdingdiang ban buh ia ki mawnongrim na ka bynta ban tei ia ki project bapher bapher jong ka sorkar jylla bad ka la sam ruh ia ki skhim na ka bynta ki nongsengkam lajong.
Ha kane ka sngi la iadonlang u Myntri Rangbah ka Sorkar jylla u Conrad K Sangma, ki Myntri ka sorkar jylla ki ophsiar bad ki nongseng kam lajong.
Hadien ba la dep buh ia ki mawnongrim na ka bynta ki project bapher bapher ha Lariti ,ka la leit jngoh ruh ia ka Nan Polok bad ia ka la pdiang sngewbha da ka Deputy Commissioner ka East Khasi Hills ka Kong RM Kurbah ha ryngkat ka jingiadon lang ki ophisar na ki tnad bapher bapher.
Ka Nirmala Sitharaman hynnin ka sngi ka 10 tarik Naitung ka la plie paidbah ia ka Shopping Complex ha Polo ha ka jingiadon lang u Myntri Rangbah ka jylla u Conrad ka Sangma, ki myntri ka sorkar jylla ki ophisar bad kiwei kiwei kiba shah khot sngewbha.
Ia ka Shopping Complex ha Polo la tei lyngba ka project shillong Smart City bad ia kane ka shopping Complex la tei da ka Badri Rai Company ha ka jinglut kaba 100.33 klur.
Ha kine ki 2 sngi ban wan ka Nirmala Sitharaman kan leit jngoh sa sha Sohra bad ha Sohra kan plie ia ki project bapher bapher bad na Sohra kan pynkut ia ka jingwan jngoh jong kaba saw sngi sha Nongbah Shillong.
